20-sentabr kuni Xitoyning Alibaba platformasida O‘zbekiston milliy pavilyonining rasmiy ochilish marosimi bo‘lib o‘tdi. Bu haqda Investitsiyalar va tashqi savdo vazirligi xabar bermoqda.
“Alibaba.com” yillik aylanmasi 106 milliard dollarni tashkil etadigan Xitoyning yetakchi savdo platformasidir. Uning asosiy faoliyati B2B shaklida kompaniyalar o‘rtasidagi savdo operatsiyalari va onlayn chakana savdoni tashkil qilishdan iborat.
O‘zbekiston pavilyoni MDH mamlakatlari orasida “Alibaba.com” saytida Rossiya va Qozog‘istondan keyin uchinchi bo‘ldi.
O‘zbekiston milliy pavilyoniga 4800 dan ortiq turdagi tovarlarga ega 50 dan ortiq mahalliy kompaniyalar kiradi.
Endilikda pavilyon yangi mahsulotlar bilan muntazam to‘ldirilib boriladi. Bo‘limdagi takliflar avtomatik ravishda tartiblanadi va sotuvlar, mijozlar reytinglari va sharhlarning AI tahlili orqali yangilanadi.
Har kuni ushbu platformada o‘zbekistonlik eksportchilar va ishlab chiqaruvchilarning qatori kengayib bormoqda. 2022-yil oxiriga kelib ular sonini 100 taga yetkazish rejalashtirilgan.
Korxonalar orasida yangi yoki quritilgan meva va sabzavotlar, tayyor to‘qimachilik va boshqa mahsulotlar ishlab chiqaruvchilar, sayyohlik xizmatlarini ko‘rsatuvchi kompaniyalar bor.
Bugungi kunga qadar Alibaba orqali O‘zbekiston eksporti hajmi 67,1 million dollarga yetdi.
Alibaba va Eksportni rag‘batlantirish agentligi 2021-yil iyul oyida hamkorlik shartnomasini imzolagan edi. Uning doirasida O‘zbekiston platformada tovarlarni ro‘yxatdan o‘tkazish uchun 70 ta korxonaga 4,6 milliard so‘m moliyaviy ko‘mak ko‘rsatdi.
Bundan tashqari, Alibaba imkoniyatlaridan samarali foydalanish bo‘yicha 4 ta seminar bo‘lib o‘tdi. Ulardan 300 dan ortiq korxona o‘tgan bo‘lsa, yil oxiriga qadar 500 ga yaqin korxona o‘tishi kutilmoqda.
Shuningdek, agentlik Alibaba Group bilan hamkorlikda Toshkent shahrida elektron tijorat forumi hamda eksportyorlar uchun bir qator seminarlar, treninglar, mahorat darslari va maslahatlar tayyorlamoqda. Tadbirlar 8—15-oktabr kunlari bo‘lib o‘tadi.
Izoh (0)