“Daryo” nashrining YouTube’dagi kanalida aktrisa va bloger Xonzoda Qambarova bilan intervyu uyushtirildi. Instagram tarmog‘ida 1,5 million obunachiga ega bloger oilaviy sharoiti sabab bolalikdan pul topishga majbur bo‘lgani va to‘ylardan “to‘ygani” haqida so‘zlab berdi.
— Onam san’atga qiziqqan bo‘lsa-da, dadam bu sohani tanlashimni istamagan. Hatto maktabni bitirishim arafasida “San’at kollejiga hujjat topshirsang, oyog‘ingni sindiraman. Bir umr uyda o‘tirasan”, deb ogohlantirgan. Maktab shahodatnomasini olgach, onamga qo‘ng‘iroq qilib, “Qaysi kollejga hujjat topshiray?”, deb so‘raganman. “Bilmadim, ko‘ngling nima desa, shuni qil”, deb go‘shakni qo‘ygan. Onamning bu gapi kuch bag‘ishlab, Toshkent madaniyat kollejiga hujjat topshirganman. Rosti, kirish imtihonlariga umuman tayyorgarlik ko‘rmaganman. Shuning uchunmi, mening o‘qishga kirishimga hech kim ishonmagan. Imtihonga kirishdan avval internet orqali monolog nima ekanligini o‘qib olganman. Ijodiy imtihondan yuqori ball olib, drama aktyorligi bo‘limiga o‘qishga qabul qilinganimda hamma shok holatiga tushgan. Ammo bu bo‘limda o‘qish nasib etmadi. Boisi drama aktyorligi bo‘limidagi mashg‘ulotlar shomga qadar davom etar ekan. Afsuski, oilaviy sharoit sabab uzoq vaqt o‘qishda qololmasdim. Chunki dadamning ishlari yurishmay qolgach, hammamiz ishlashga majbur bo‘lganmiz. Onam “Abu-saxiy” bozoridagi sotuvchilarga do‘konma-do‘kon yurib kosmetika sotardi. Akam o‘qishdan keyin yarim kechga qadar choyxonada ishlardi. Men esa ovqatlarni qilish va onamga yordamlashishga mas’ul edim. Onam bilan og‘ir xaltalarni ko‘tarib, har bir do‘konga kirib “Kosmetika olinglar, nasiyaga ham beramiz”, deb chiqardik. Xullas, kechgacha o‘qish menga to‘g‘ri kelmasdi. Shunda kimdir an’anaviy xonandalik bo‘limida o‘qishni tavsiya qilgan. Chunki ularda dars tushdan keyin tugar ekan. Ana shu jihati ma’qul bo‘lgani uchun drama aktyorligi bo‘limida o‘qishdan voz kechganman. Ammo u paytda maqom qo‘shiqlar bo‘yicha o‘qishim xayolimga ham kelmagandi, — deydi aktrisa va bloger Xonzoda Qambarova.
Xonzoda to‘ylarga chiqib pul topishga majbur bo‘lgani va ba’zi paytlari bundan afsuslanishi haqida aytib o‘tdi
— Kollejning birinchi kursida o‘qiyotganimizda ustozlarimiz to‘yga olib chiqishgan. Adashmasam, o‘shanda 50 ming so‘m pul berishgandi. Mana shundan keyin to‘ylarga chiqib, bek-vokal xonandasi sifatida ishlab, pul topishim mumkinligini tushunganman. Ijaraga ko‘ylak olib, to‘ylarga chiqishga qaror qilganman. Chunki o‘sha paytda onam kun bo‘yi ishlab 50 ming, akam 30 ming topsa, men bitta to‘ydan 150 ming so‘m haq olardim. Ro‘zg‘orimiz yaxshilanayotganidan oila a’zolarim ham quvonishgan. Ammo men ba’zida bundan afsuslanaman. Chunki o‘quvchilik yillarimning eng shirin paytlari to‘ydan to‘yga yugurish bilan o‘tgan. Ammo to‘yning ham yaxshi tomonlari bor. Juda ko‘plab mashhur san’atkorlar ham to‘y xizmatlari sabog‘ini olib, mashhurlik cho‘qqisiga yetishgan, — deydi Xonzoda Qambarova.
Bundan tashqari, Xonzoda keyingi paytlarda uy va qimmatbaho mashina olgani haqidagi xabarlarni omma bilan bo‘lishayotgan bloger va vaynerlarga o‘z munosabatini bildirdi.
— Ko‘pchiligi uyni reklama qilish uchun “oldim” deb video qo‘yishadi. Aslida esa bu shunchaki reklama videosi. Qurilayotgan uy 2-3 yilda bitgunicha odamlarning esidan chiqib ketadi yoki sotib yubordim deyishadi, — deydi u.
Izoh (0)