Ukrainaning bosib olingan hududlarida qurol ko‘targan rossiyalik askarlar eshikma-eshik yurib, referendum uchun ovoz yig‘ayotgani aks etgan video tarqaldi.
Videokuzatuv kameralaridan olingan kadrlarda 2022-yil 23-sentabr kuni Ukrainaning egallab olingan Zaporojye viloyatida ovoz to‘plash uchun uyma-uy yurgan saylov komissiyasi a’zolariga avtomat ko‘targan Rossiya askarlari hamrohlik qilayotganini ko‘rish mumkin.
Rossiyaga qo‘shilish haqidagi referendum
23-sentabr kuni o‘zini o‘zi respublika deb e’lon qilgan Lugansk va Donetsk xalq respublikalarida, shuningdek, Ukrainaning Rossiya qo‘shinlari nazoratidagi Zaporojye va Xerson viloyatlarida “Rossiya tarkibiga qo‘shilish bo‘yicha referendumlar” boshlandi.Barcha hududlarda “ovoz berish” besh kun, ya’ni 27-sentabrgacha davom etadi. Shundan so‘ng ovozlarni sanash boshlanadi. Shu bilan birga, LXR va DXRda hamda qolgan ikki viloyatda dastlabki to‘rt kun davomida saylov komissiyalari mahalliy aholining uylariga boradi. Referendumning so‘nggi kunida esa LXR, Zaporojye va Xerson viloyatlaridagi saylov uchastkalari Toshkent vaqti bilan soat 10:00 dan 18:00 gacha, DXRda 10:00 dan 22:00 gacha ochiq bo‘ladi.
DXR va LXRda mahalliy aholi “respublikaning Rossiya Federatsiyasi ta’sis subyekti sifatida Rossiya tarkibiga kirishini” qo‘llab-quvvatlaydimi yoki yo‘qmi degan savol “ovozga” qo‘yilgan.
Zaporojye va Xerson viloyatlarida esa “Siz Ukrainadan ajralib chiqish, mintaqaning mustaqil davlat tashkil etishi va Rossiya Federatsiyasi tarkibiga kirishi tarafdorimisiz?” degan savol “ovoz”ga qo‘yilgan.
Shundan keyin NATO “soxta” referendumlarga javoban Ukrainaga bo‘lgan yordamni kuchaytirishga va’da berdi.
Izoh (0)