Rossiyalik harbiylar Xersondan chekinmoqchi bo‘lgan, ammo Putin buni taqiqlagan va endi joylarda strategik qarorlarni o‘zi qabul qilishini aytgan

So‘nggi haftalarda Rossiya prezidenti Ukrainadagi urushni strategik rejalashtirishda yanada faolroq ishtirok eta boshladi, deb yozadi Meduza. Masalan, The New York Times gazetasi amerikalik mansabdorlarga tayanib ma’lum qilishicha, Vladimir Putin Rossiya harbiylarining Xersondan chekinish haqidagi iltimosini rad etgan.

Xersondan ketish orqali rossiyalik harbiylar texnika va shaxsiy tarkibni saqlab qolgan holda, uyushgan tarzda Dnepr ortiga chekingan bo‘lardi. Ammo bunday chekinish Putinning urushdagi mag‘lubiyatining omma oldida yana bir marta tahqirli tan olishi bo‘lgan bo‘lardi va Ukrainaga bir oy ichidagi ikkinchi yirik g‘alabani keltirgan bo‘lardi”, — deb yozadi NYT.

Nashr manbalariga ko‘ra, Putin generallarga joylardagi strategik qarorlar shaxsan uning o‘zi tomonidan qabul qilinishini aytgan. Bu harbiylar orasida keskinlikni yuzaga keltirgan, Xersondan qo‘shinlarni olib ketish taklifi Putin tomonidan qabul qilinmagani esa rossiyalik harbiy xizmatchilar ma’naviy ruhining tushishiga sabab bo‘lgan — ular ta’minot liniyasidan uzilib qolgani tufayli qiyin ahvolda qolishlarini taxmin qilmoqda.

Sentabr o‘rtalarida Ukraina prezidenti Vladimir Zelenskiy oy boshidan beri ukrainalik harbiylar mamlakat sharqi va janubida Rossiya ishg‘oli ostidagi olti ming kvadrat kilometrdan ortiq hududni ozod qilganini aytgandi.

Avgust oyi oxirida Ukraina qurolli kuchlari Xerson viloyatiga, sentabr oyi boshida Xarkov viloyatiga qarshi hujum boshladi. Xarkov yo‘nalishidagi hujum urush boshidan beri eng muvaffaqiyatli bo‘ldi. Xarkov viloyati rahbari Oleg Sinegubov 11-sentabr kuni Ukraina harbiylari sentabr boshidan buyon mintaqadagi 40 dan ortiq shahar va qishloqlarni ozod qilganini aytdi.