Еврокенгаш раиси Шарль Мишель мамлакатдан қочиб кетмоқчи бўлган Россия фуқароларини ўз ҳудудига киритиши кераклигини маълум қилди, деб ёзади Meduza.
«Европа иттифоқи ўз сиёсий қарашлари туфайли хавф остида бўлганларни қабул қилиши керак. Агар Россияда одамлар ўз сиёсий қарашлари сабабли, улар Кремлнинг Украинада уруш бошлашга оид тентакона қарорини қўллаб-қувватламаслиги сабабли хавф остида бўлса, биз буни ҳисобга олишимиз керак. Янги ҳолат юзага келгани — Россияда қисман сафарбарлик эълон қилингани муносабати билан саъй-ҳаракатларимизни тезликда мувофиқлаштиришимиз кераклигига қўшиламан», — деди Мишель.
Аввалроқ бир қатор европалик сиёсатчилар — хусусан, Литва ташқи ишлар вазири — уларнинг мамлакатлари сафарбарликдан қочаётган россияликларга бошпана бермаслигини маълум қилганди. Европалик баъзи ҳуқуқшунослар қайд этишича, бундай сиёсат Қочқинлар мақоми тўғрисидаги конвенцияга ва Евроиттифоқнинг бошпана тақдим этиш тўғрисидаги қонунига зиддир.
Шунингдек, Германия муайян ҳолатларда Россия армияси дезертир (қочоқ)ларига ва «Путин режимига қарши бўлганлар»га бошпана беришга тайёрлигини билдирганди. Айни вақтда Чехия Ташқи ишлар вазирлиги мамлакат сафарбарликдан қочаётган Россия фуқароларига гуманитар визалар бермоқчи эмаслигини маълум қилди.
Россияда нималар бўляпти?
21 сентябрь куни Россия президенти Владимир Путин Россияда қисман сафарбарлик эълон қилиш ҳақидаги фармонни имзолади. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.
Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади. Хизмат ўтаб бўлган, ҳарбий-ҳисоб мутахассислиги ва жанговар тажрибага эга бўлганларгина чақирилади. Талабалар ва шошилинч хизмат ҳарбий хизматчилари сафарбар этилмайди, деган эди Шойгу.
Армияга чақириладиган одамлар сони кўрсатилган банд сафарбарлик ҳақидаги фармонда махфийлаштириб қўйилган. «Новая газета. Европа» нашри хабарига кўра, ушбу бандда бир миллион киши армияга чақирилиши ҳақида айтилади. Meduza’нинг федерал вазирликлардан бирига яқин манбаси айтиб беришича, армияга 1,2 миллион кишини чақириш режалаштирилмоқда.
Изоҳ (0)