BMT Bosh assambleyasining 77-sessiyasida ishtirok etish uchun Nyu-York shahrida bo‘lib turgan O‘zbekiston tashqi ishlar vaziri Vladimir Norov AQSH davlat kotibining siyosiy masalalar bo‘yicha o‘rinbosari Viktoriya Nuland bilan uchrashuv o‘tkazdi. Bu haqda TIV axborot xizmati xabar qildi.
Qayd etilishicha, Viktoriya Nuland Amerika tomoni O‘zbekistonda amalga oshirilayotgan islohotlar va ochiqlik siyosatini qo‘llab-quvvatlashini ta’kidlagan. Rasmiy Vashingtonning O‘zbekiston bilan aloqalarni ikki tomonlama darajada va C5+1 formatida mustahkamlashga tayyorligi ma’lum qilingan.
AQSH Davlat kotibining o‘rinbosari O‘zbekistonning Markaziy Osiyo mamlakatlari bilan yaxshi qo‘shnichilik munosabatlarini rivojlantirish, shuningdek, mintaqalararo aloqalarni mustahkamlash borasidagi tashabbuslari va amaliy qadamlarini olqishlagan. O‘zbekistonning Afg‘onistonda barqaror tinchlik va barqarorlikka erishish, qo‘shni davlatga keng ko‘lamli gumanitar yordam ko‘rsatish, infratuzilma va energetika loyihalarini amalga oshirish borasidagi sa’y-harakatlariga yuqori baho berilgan.
Uchrashuv davomida turli darajadagi bo‘lajak tadbirlar jadvali, shuningdek, savdo-investitsiya va madaniy-gumanitar aloqalarni rivojlantirish bo‘yicha ham fikr almashilgan.
Izoh (0)