Xalq deputatlari Samarqand viloyati kengashining navbatdagi sessiyasida viloyati prokurori Jahongir Hotamov prezidentning “O‘zbekiston Respublikasining ijtimoiy va ishlab chiqarish infratuzilmasini rivojlantirish dasturi hamda boshqa davlat dasturlari ijrosi ustidan nazoratni kuchaytirishga doir qo‘shimcha chora-tadbirlar to‘g‘risida”gi qarorining ijrosi yuzasidan hisobot berdi. Bu haqda O‘zA xabar qildi.
“Hududiy shtab o‘zining ustuvor faoliyatini qurilish sohasidagi qonun buzilishlarni aniqlash va uning oqibatlari bilan kurashishga emas, balki bu boradagi sodir etilishi mumkin bo‘lgan jinoiy xatti-harakatlar hamda huquqbuzarliklarni oldini olishga qaratib, xato-kamchiliklarni o‘z vaqtida bartaraf etishga yo‘naltirib kelmoqda. Mazkur jarayonlarda har bir loyihaning asosliligi o‘rganilib, loyiha hujjatlariga 230 ta holatda ortiqcha yoki zaruriyatsiz kiritilgan 58,5 milliard so‘m mablag‘ maqbullashtirildi”, — deydi Hotamov.
Xususan, Payariq tumanidagi 59-umumta’lim maktabini rekonstruksiya qilish bo‘yicha “Samkadastr” MCHJ tomonidan 1 milliard 420,4 million so‘mga ishlab chiqilgan loyiha-smeta hujjatlarida ora yopma plitalar soni oshirib ko‘rsatilishi oqibatida obyekt qiymati sun’iy ravishda 119,7 million so‘mga oshirib ko‘rsatilgan. Urgut tumanidagi 121-maktabning fasad qismi suvoq ishlarida 145 million so‘m, 81-maktabda narxlarni oshirib ko‘rsatish orqali 47 million so‘m va Kattaqo‘rg‘on shahridagi 11-maktabni rekonstruksiya qilish obyekti smetasida material xarajatlariga 206 million so‘m ortiqcha xarajatlar ko‘rsatilgani aniqlanib, bartaraf etilgan. Shuningdek, vazifalarning joylardagi ijrosi ahvoli, muammolarni aniqlash va bartaraf etish maqsadida viloyat shtabi rahbari boshchiligidagi ishchi guruh tomonidan barcha hududlar o‘rganib chiqildi.
Hududlardagi vaziyat hamda dasturlar ijrosi mas’ul xodimlar ishtirokida muhokama qilinib, vazifasini lozim darajada bajarmagan va qonun buzilishiga yo‘l qo‘ygan 42 nafar mas’ullar intizomiy, 197 nafari ma’muriy javobgarlikka tortilgan. Qo‘pol qonun buzilish holatlari yuzasidan 17 ta jinoyat ishi qo‘zg‘atilgan va jinoyat oqibatida yetkazilgan 3 milliard 878 million so‘mlik zarar undirilgan.
Misol uchun, “Obod qishloq” dasturi doirasida “Qobil Quruvchi Servis” MCHJ tomonidan Pastdarg‘om tumanidagi 21-maktabda olib borilgan qurilish-montaj ishlari davomida 587,2 million so‘m mablag‘ talon-toroj qilingani holati yuzasidan jinoyat ishi qo‘zg‘atilib, sudning hukmi bilan aybdor shaxslarga nisbatan jazo muqarrarligi ta’minlangan va yetkazilgan zarar to‘liq undirilgan. Qurilish ishlari amalga oshirilishi ko‘zda tutilgan barcha obyektlar pudratchilari “Shaffof qurilish” milliy axborot tizimidagi elektron tender savdolari orqali tanlanishi, qurilish-ta’mirlash jarayonlarida manfaatlar to‘qnashuviga yo‘l qo‘yilmasligi, qurilish ishlarida mualliflik, texnik va davlat nazorati olib borilishini ta’minlash va aniqlangan kamchiliklar haqida hududiy shtabga axborot berib borish tizimi yo‘lga qo‘yilgan. Ushbu yo‘nalishdagi o‘rganishlarda viloyatdagi 11 ta qurilish-pudrat tashkiloti tomonidan statistika, soliq, bandlik va boshqa idoralarga soxta hisobotlar topshirilishi oqibatida “Shaffof qurilish” milliy axborot tizimi orqali o‘tkazilgan 27 ta tender savdolarida jami 219 milliard so‘mlik obyektlar qurilishida g‘oliblikni qo‘lga kiritganligi ma’lum bo‘lgan.
Mazkur holatlar yuzasidan jinoyat ishi qo‘zg‘atilib, aybdorlarga tegishli choralar ko‘rilgan. Viloyatda qurilish ishlarida sifatni ta’minlash va turli qing‘ir harakatlarning oldini olish maqsadida dasturga kiritilgan ijtimoiy soha obyektlarida video kuzatuv kameralari o‘rnatilgan. Onlayn rejimda ishlovchi kuzatuv kameralarining yozuvi bir oy davomida saqlash imkoniyati yaratilgan va kuzatuv kameralari viloyat shtabiga integratsiya qilingan.
Izoh (0)