БМТ Бош ассамблеясининг 77-сессиясида иштирок этиш учун Нью-Йорк шаҳрида бўлиб турган Ўзбекистон ташқи ишлар вазири Владимир Норов АҚШ давлат котибининг сиёсий масалалар бўйича ўринбосари Виктория Нуланд билан учрашув ўтказди. Бу ҳақда ТИВ ахборот хизмати хабар қилди.
Қайд этилишича, Виктория Нуланд Америка томони Ўзбекистонда амалга оширилаётган ислоҳотлар ва очиқлик сиёсатини қўллаб-қувватлашини таъкидлаган. Расмий Вашингтоннинг Ўзбекистон билан алоқаларни икки томонлама даражада ва C5+1 форматида мустаҳкамлашга тайёрлиги маълум қилинган.
АҚШ Давлат котибининг ўринбосари Ўзбекистоннинг Марказий Осиё мамлакатлари билан яхши қўшничилик муносабатларини ривожлантириш, шунингдек, минтақалараро алоқаларни мустаҳкамлаш борасидаги ташаббуслари ва амалий қадамларини олқишлаган. Ўзбекистоннинг Афғонистонда барқарор тинчлик ва барқарорликка эришиш, қўшни давлатга кенг кўламли гуманитар ёрдам кўрсатиш, инфратузилма ва энергетика лойиҳаларини амалга ошириш борасидаги саъй-ҳаракатларига юқори баҳо берилган.
Учрашув давомида турли даражадаги бўлажак тадбирлар жадвали, шунингдек, савдо-инвестиция ва маданий-гуманитар алоқаларни ривожлантириш бўйича ҳам фикр алмашилган.
Изоҳ (0)