Xalq deputatlari Samarqand viloyati kengashining navbatdagi sessiyasida viloyat prokurori Jahongir Hotamov prezidentning “O‘zbekiston Respublikasining ijtimoiy va ishlab chiqarish infratuzilmasini rivojlantirish dasturi hamda boshqa davlat dasturlari ijrosi ustidan nazoratni kuchaytirishga doir qo‘shimcha chora-tadbirlar to‘g‘risida”gi qarorining ijrosi yuzasidan hisobot berdi. Bu haqda O‘zA xabar qildi.
Qayd etilishicha, davlat rahbarining tegishli qarori bilan tasdiqlangan dastur doirasida viloyatda 189 ta obyektda qurilish-ta’mirlash ishlari bajarilishi va ularning 172 tasi joriy yilda yakunlanishi belgilangan.
Hozirga qadar budjetdan 802,5 milliard so‘m mablag‘ yoki ajratilgan limitning 76 foizi moliyalashtirilib, 774 milliard so‘m o‘zlashtirilgan. 77 ta obyektda belgilangan ishlar yakunlanib, foydalanishga topshirilgan.
2 ta obyektning ekspertiza xulosalari olinmagan va 4 tasining pudratchisi aniqlanmagan. Shuningdek, 3 ta maktabgacha ta’lim tashkiloti, 6 ta maktab, 2 ta oliy ta’lim muassasalarining qurilishi o‘quv yili boshlangunga qadar tamomlanmasdan qolgan.
“Obod qishloq” va “Obod mahalla” dasturi doirasida 32 ta mahalla va qishloqlar uchun ajratilgan 446,1 milliard so‘m mablag‘ evaziga 1026 ta obyektda qurilish-ta’mirlash ishlari bajarilishi rejalashtirilib, bugungi kunda 70 milliard so‘m moliyalashtirilgan.
Ta’kidlanishicha, Samarqandda 11 ta qurilish-pudrat tashkiloti soxta ma’lumotlar asosida “Shaffof qurilish”da g‘olib bo‘lgan.
Izoh (0)