O‘zbekistondan 50 nafarga yaqin tibbiyot xodimi Hindistonning yetakchi klinikalarida malaka oshirish uchun jo‘nab ketdi. Bu haqda Sog‘liqni saqlash vazirligi matbuot xizmati xabar berdi.
Qayd etilishicha, 28-iyul kuni Dehli shahrida bo‘lib o‘tgan O‘zbekiston–Hindiston hukumatlararo komissiyasining 13-yig‘ilishi doirasida hind o‘lkasidagi yirik tibbiyot kompaniyalari bilan hamkorlik bo‘yicha kelishuvlar imzolangan.
Xususan, Sog‘liqni saqlash va farmatsevtika sohasida 2022–2023-yillarga mo‘ljallangan ikki tomonlama hamkorlik dasturiga muvofiq, 50 nafarga yaqin tibbiyot xodimi Hindistonning bir qator yetakchi klinikalarida malaka oshirish uchun jo‘nab ketdi.
O‘zbekistonning har bir hududidan saralab olingan xirurg, neyroxirurg, nevrolog, nefrolog, onkolog, reanimatolog, laborator-vrach, operatsion blok hamshirasi va hududiy tibbiy boshqaruv xodimlaridan iborat jamoa bir oy davomida hind shifokorlari tajribasini o‘rganadi.
Ularga Hindistonning “Yashoda Hospitals”, “AIG Hospitals”, “Medanta the Medicity”, “Sri Sri Holistic Hospitals” va “Image Hospitals” kabi mashhur shifoxonalarida joriy qilingan ilg‘or davolash usullarini o‘zlashtirib, mamlakat tibbiyot tizimiga tatbiq qilish vazifasi yuklatilgan.
Mutaxassislarning xizmat safari davomida mehmonxona, ovqatlanish va transport xarajatlari mezbonlar tomonidan, ularning borib-kelish va kunlik xarajatlarining bir qismi esa Iqtidorli va malakali tibbiyot mutaxassislarini qo‘llab-quvvatlash hamda tibbiyot muassasalariga jalb qilish jamg‘armasi hisobidan qoplanadi.
Izoh (0)