Ijtimoiy tarmoqlarda Andijon shahrining sobiq prokurori Q.A.ga oid jinoyat ishi bo‘yicha sudyaga juda ko‘p miqdorda pora berishga uringan S.A. qo‘lga olingani haqida xabar tarqaldi. Sudyalar oliy kengashi matbuot xizmatining ma’lum qilishicha, bu xabarlar haqiqatga to‘g‘ri kelmaydi.
Aniqlanishicha, xabarda qayd etilgan S.A. qariyb bir oy muqaddam boshqa hudud va umuman boshqa holatda firibgarlik jinoyati ustida qo‘lga olingan bo‘lib, ayni paytda tergov harakatlari olib borilmoqda.
Ushbu holatning shu kunlarda Farg‘ona viloyati sudida mazmunan ko‘rib chiqilayotgan Andijon shahrining sobiq mansabdor shaxslari va boshqalarga oid jinoyat ishi bo‘yicha sudlanuvchilar hamda (ish bo‘yicha raislik etuvchi) sudyaga biron-bir bog‘liqligi yo‘q.
Ma’lumot uchun, Farg‘onada Andijon shahri sobiq hokimi va yana 43 kishiga oid ish ko‘rib chiqilmoqda. Ular orasida sobiq prokuror Q.A. (erkak, 1982-yilda Andijon viloyatida tug‘ilgan, muqaddam sudlanmagan, Andijon shahri prokurori va Andijon viloyati prokurorining jamoatchilik bilan aloqalar va huquqiy axborot bo‘yicha katta yordamchisi lavozimlarida ishlagan) ham bor.
Avvalroq sobiq hokim Bahrom Haydarovning davlat manfaatlariga 1,7 milliard so‘m zarar keltirganlikda ayblanayotgani, uning deputatlik daxlsizligini bekor qilish uchun viloyat prokuraturasiga taqdimnoma kiritilgani xabar qilingan edi. “Daryo” muxbiri bilan suhbatlashgan hokim esa buni inkor etgandi.
Izoh (0)