Ўзбекистондан 50 нафарга яқин тиббиёт ходими Ҳиндистоннинг етакчи клиникаларида малака ошириш учун жўнаб кетди. Бу ҳақда Соғлиқни сақлаш вазирлиги матбуот хизмати хабар берди.
Қайд этилишича, 28 июль куни Деҳли шаҳрида бўлиб ўтган Ўзбекистон–Ҳиндистон ҳукуматлараро комиссиясининг 13-йиғилиши доирасида ҳинд ўлкасидаги йирик тиббиёт компаниялари билан ҳамкорлик бўйича келишувлар имзоланган.
Хусусан, Соғлиқни сақлаш ва фармацевтика соҳасида 2022–2023 йилларга мўлжалланган икки томонлама ҳамкорлик дастурига мувофиқ, 50 нафарга яқин тиббиёт ходими Ҳиндистоннинг бир қатор етакчи клиникаларида малака ошириш учун жўнаб кетди.
Ўзбекистоннинг ҳар бир ҳудудидан саралаб олинган хирург, нейрохирург, невролог, нефролог, онколог, реаниматолог, лаборатор-врач, операцион блок ҳамшираси ва ҳудудий тиббий бошқарув ходимларидан иборат жамоа бир ой давомида ҳинд шифокорлари тажрибасини ўрганади.
Уларга Ҳиндистоннинг «Yashoda Hospitals», «АIG Hospitals», «Medanta the Medicity», «Sri Sri Holistic Hospitals» ва «Image Hospitals» каби машҳур шифохоналарида жорий қилинган илғор даволаш усулларини ўзлаштириб, мамлакат тиббиёт тизимига татбиқ қилиш вазифаси юклатилган.
Мутахассисларнинг хизмат сафари давомида меҳмонхона, овқатланиш ва транспорт харажатлари мезбонлар томонидан, уларнинг бориб-келиш ва кунлик харажатларининг бир қисми эса Иқтидорли ва малакали тиббиёт мутахассисларини қўллаб-қувватлаш ҳамда тиббиёт муассасаларига жалб қилиш жамғармаси ҳисобидан қопланади.
Изоҳ (0)