O‘zbekistonda ishlab chiqarilayotgan mahsulotlarning Misr va u orqali Afrika davlatlari bozoriga eksporti ko‘lamlarini kengaytirish va diversifikatsiyalashtirish, shuningdek, o‘zaro hamkorlikda qo‘shma loyihalarni amalga oshirish masalalarini muhokama etish maqsadida Misr Arab Respublikasining Port Said viloyati hokimi, general Odil Ibrohim al-G‘adban bilan muzokaralar o‘tkazildi. Bu haqda “Dunyo” axborot agentligi xabar qildi.
Qayd etilishicha, Port Said viloyati hokimi hududlararo to‘g‘ridan-to‘g‘ri aloqalarni yo‘lga qo‘yish, mamlakatlarning biznes missiyalarini tashkil etish ikki tomonlama munosabatlarni yangi bosqichga olib chiqishga xizmat qilishini aytgan. U, shuningdek, Namangan viloyati ma’muriy markazi bilan “Birodarlashgan shaharlar” bitimini imzolashga tayyor ekanini ham ma’lum qilgan.
Shu kunning o‘zida Port Said Savdo palatasi qarorgohida uning raisi Muhammad Saada hamda tashkilotga a’zo bo‘lgan qator yirik kompaniyalarning rahbarlari bilan uchrashuv o‘tkazilgan. Bo‘lib o‘tgan muzokaralardan so‘ng O‘zbekistonning strategik rivojlantirish dasturi, investitsion va turistik salohiyati hamda Namangan viloyatining iqtisodiy imkoniyatlari taqdim etilgan.
Muzokaralardan so‘ng nafaqat Misr, balki butun Yaqin Sharq mintaqasida yirik va yetakchi kompaniya hisoblanadigan Lotus Garments Co., Ul Hwa Tex Misr—Koreya to‘qimachilik kompaniyalari faoliyati bilan tanishilgan. Ushbu kompaniyalar rahbarlari joriy yil 11—12-oktabr kunlari Toshkentda o‘tkaziladigan Tashkent Textile Summit ishida ishtirok etishga taklif qilingan. Mazkur kompaniyalarning O‘zbekistondagi yirik to‘qimachilik korxonalari bilan onlayn muzokaralarini tashkil etish bo‘yicha kelishuvga erishilgan.
Ma’lumot uchun, Port Said viloyati o‘z hududidan o‘tadigan xalqaro ahamiyatga ega bo‘lgan Suvaysh kanali bilan dunyoga mashhur. Misrda ishlab chiqariladigan to‘qimachilik mahsulotlari eksportining 54 foizi ushbu hudud hissasiga to‘g‘ri keladi.
Izoh (0)