Ijtimoiy tarmoqlarda Toshkent shahri Uchtepa tumani “Aziz ota” jome masjidi imom noibi vazifasida ishlab kelgan Vohidov Mirsobitning diniy soha vakili maqomiga zid chiqishi fuqarolarning bahs-munozaralariga sabab bo‘lmoqda. O‘zbekiston musulmonlari idorasi matbuot xizmati bunga munosabat bildirdi.
“Vohidov Mirsobitning ijtimoiy tarmoq orqali imomlik maqomi va amaldagi qonun-qoidalarga e’tibor qilmay, go‘yoki Islom dini samosud qilishga chaqirishi to‘g‘risidagi qarashlari aslida dinimiz ta’limotiga zid va voqelikka nisbatan O‘zbekiston musulmonlari idorasi munosabatini ifoda etmaydi.
O‘zbekiston musulmonlari idorasi fuqarolarni amaldagi qonunlarga zid ravishda zo‘ravonlikka chaqiruvchi har qanday chiqishlarni qat’iy qoralaydi hamda ularni qonunchilik talablariga chuqur hurmat bilan munosabatda bo‘lishga va to‘la rioya etishga chaqiradi”, — deyiladi idora munosabatida.
Qayd etilishicha, diniy idoraning avval qabul qilingan va ijroga yo‘naltirilgan hujjatlarida masjidlarda faoliyat yuritayotgan imom-xatib va noiblar amaldagi qonunchilik, odob-axloq qoidalari, mehnat majburiyatlariga amal qilish hamda ijtimoiy tarmoqlardagi chiqishlarida diniy asosda adovat qo‘zg‘atuvchi axborot tarqatmaslik, noxolis va salbiy mazmundagi keskin munozaralarga sabab bo‘luvchi chiqish qilmaslik talablari qat’iy belgilab qo‘yilgan.
Shuningdek, O‘zbekiston musulmonlari idorasi tomonidan 2022-yil 13-sentabr kuni chiqarilgan buyruqda ham diniy soha vakillarining masjidlar va diniy marosimlarda, Internet tarmog‘idagi chiqishlarida ijtimoiy beqarorlikka, milliy yoki diniy asosda nizo keltirib chiqishiga sabab bo‘lishi mumkin bo‘lgan ma’lumotlarni tarqatmaslik alohida ta’kidlangan.
Biroq yuqoridagi talablarga qaramay, Vohidov Mirsobit o‘z chiqishida huquqiy-me’yoriy hujjatlar talablarini buzib, O‘zbekiston musulmonlari idorasining mazkur yo‘nalishdagi buyruqlari, imom-xatib va imom noiblarning odob-axloq qoidalari hamda mehnat majburiyatlaridagi talablarga rioya etmagan.
O‘zbekiston musulmonlari idorasi huzuridagi Odob-axloq komissiyasi tomonidan Vohidov Mirsobitning ijtimoiy tarmoqlarda diniy soha vakili maqomiga zid chiqishi, shuningdek, diniy idora ichki me’yoriy hujjatlari talablarini qo‘pol ravishda buzgani hamda amaldagi qonunchilikka hurmatsizlikka yo‘l qo‘ygani ko‘rib chiqilib, 19-sentabr kuni u bilan tuzilgan mehnat shartnomasi bekor qilinib, egallab turgan vazifasidan ozod etilgan.
Izoh (1)
Ас Салому Алайка ва Рахматуллоху ва Баракотху.!
Роббимиз шундай тинч замонни,,осуда осмонни насиб этган Ватанизнинг Дин пешволарига Нима етишмайди УЗИ..Хукумат томонидан яратиб берилган имкониятларга хурсанд булмай Яна нимани талашади бу муллазодалар.??