Ўзбекистонда ишлаб чиқарилаётган маҳсулотларнинг Миср ва у орқали Африка давлатлари бозорига экспорти кўламларини кенгайтириш ва диверсификациялаштириш, шунингдек, ўзаро ҳамкорликда қўшма лойиҳаларни амалга ошириш масалаларини муҳокама этиш мақсадида Миср Араб Республикасининг Порт Саид вилояти ҳокими, генерал Одил Иброҳим ал-Ғадбан билан музокаралар ўтказилди. Бу ҳақда «Дунё» ахборот агентлиги хабар қилди.
Қайд этилишича, Порт Саид вилояти ҳокими ҳудудлараро тўғридан-тўғри алоқаларни йўлга қўйиш, мамлакатларнинг бизнес миссияларини ташкил этиш икки томонлама муносабатларни янги босқичга олиб чиқишга хизмат қилишини айтган. У, шунингдек, Наманган вилояти маъмурий маркази билан «Биродарлашган шаҳарлар» битимини имзолашга тайёр эканини ҳам маълум қилган.
Шу куннинг ўзида Порт Саид Савдо палатаси қароргоҳида унинг раиси Муҳаммад Саада ҳамда ташкилотга аъзо бўлган қатор йирик компанияларнинг раҳбарлари билан учрашув ўтказилган. Бўлиб ўтган музокаралардан сўнг Ўзбекистоннинг стратегик ривожлантириш дастури, инвестицион ва туристик салоҳияти ҳамда Наманган вилоятининг иқтисодий имкониятлари тақдим этилган.
Музокаралардан сўнг нафақат Миср, балки бутун Яқин Шарқ минтақасида йирик ва етакчи компания ҳисобланадиган Lotus Garments Cо., Ul Hwa Tex Миср—Корея тўқимачилик компаниялари фаолияти билан танишилган. Ушбу компаниялар раҳбарлари жорий йил 11—12 октябрь кунлари Тошкентда ўтказиладиган Tashkent Textile Summit ишида иштирок этишга таклиф қилинган. Мазкур компанияларнинг Ўзбекистондаги йирик тўқимачилик корхоналари билан онлайн музокараларини ташкил этиш бўйича келишувга эришилган.
Маълумот учун, Порт Саид вилояти ўз ҳудудидан ўтадиган халқаро аҳамиятга эга бўлган Сувайш канали билан дунёга машҳур. Мисрда ишлаб чиқариладиган тўқимачилик маҳсулотлари экспортининг 54 фоизи ушбу ҳудуд ҳиссасига тўғри келади.
Изоҳ (0)