“Toshkent shahrida tirbandlik masalasiga oxirgi 5 yilda katta e’tibor qaratilmoqda” – Furqat Mahmudxo‘jayev

Toshkent shahrida O‘zbekistonda barqaror harakatlanish va sog‘lom turmush tarziga bag‘ishlangan to‘rtinchi Yevropa harakatlanish haftaligi boshlandi. Tadbirlar aholini jamoat transportida, velosipedda va piyoda harakatlanishga jalb qilish orqali avtomobillardan chiqadigan zaharli gazlarni kamaytirib, havo ifloslanishining oldini olishga qaratilgan.

Toshkent shahar hokimligi qoshidagi jamoatchilik kengashi raisi Furqat Mahmudxo‘jayevning “Daryo” muxbiriga ma’lum qilishicha, Toshkent shahrida tirbandlik masalasiga oxirgi 5 yilda katta e’tibor qaratilmoqda.

“Avtobuslar endi ko‘paya boshladi. Ahamiyat berilsa, metroda tirbandlik kunning ma’lum paytidagina bo‘ladi. Ertalab, kechqurun va peshindan keyin ham ozgina payt oralig‘ida kuzatiladi. Buni aniq aytayotganim sababi shundaki, o‘zim ham ko‘p metroda yuraman. Tan olishimiz lozimki, shahar transporti bizda endi rivojlanmoqda. Elektrobuslar olib kelinyapti. Avtobuslar sotib olinmoqda. Bundan to‘g‘ri foydalanish kerak. Ayniqsa, yoshlarimiz jamoat transportiga chiqqanda yozib, chizib ketmasliklarini iltimos qilamiz, chunki bundan o‘zimiz foydalanamiz”, — dedi kengash raisi.

Uning qo‘shimcha qilishicha, velosipedda harakatlanish uchun shaharda juda katta ishlar qilingan.

“Lekin kamchiliklarni ham ko‘rib turibmiz. Velosipedda harakatlanib, ma’lum paytdan keyin noqulayliklar sabab harakatlanishni to‘xtatishga majbur bo‘lyapmiz”, — dedi Furqat Mahmudxo‘jayev.

Ma’lumot uchun, to‘rtinchi Yevropa harakatlanish haftaligi 19—25-sentabr kunlari o‘tkazilishi rejalashtirilgan. Xususan, “Mahallalar Yevropa harakatlanish haftasi tarafdori”, “Avtomobilsiz veloharakat kuni”, “Avtomobilsiz kun” kabi tadbirlar o‘tkazish ko‘zda tutilgan.

Eslatib o‘tamiz, O‘zbekistonda tartibga solinmagan serqatnov piyodalar va velosipedda harakatlanuvchilar uchun o‘tish yo‘llarida maxsus svetoforlar o‘rnatilishi hamda 2021-yil iyuldan boshlab vazir va hokimlarning semizlik darajasini onlayn kuzatib borish tizimi yo‘lga qo‘yilishi haqida xabar berilgandi.