Bolalik yillari, UFC, hayot tarzi va og‘ir judolik. Habib Nurmagomedovning hayot yo‘li haqida

UFC sobiq chempioni, MMA’dagi faoliyatini birorta ham mag‘lubiyatga uchramay yakunlagan Habib Nurmagomedov 20-sentabr kuni 34 yoshni qarshi oldi. “Daryo” shu munosabat bilan rossiyalik yakkakurashchi haqidagi 2020-yilgi materialni to‘ldirilgan holda qayta e’lon qiladi.

Bolaligi va faoliyatining boshlanishi

Habib Abdulmanapovich Nurmagomedov 1988-yilda Dog‘istonning tog‘li Sildi qishlog‘ida dunyoga kelgan. E’tiborli tomoni shundaki, Habib o‘zining ilk qadamlarini aynan kurash tatamisida qo‘yadi. Uning otasi Abdulmanap Nurmagomedov Rossiyada xizmat ko‘rsatgan murabbiy va erkin kurash bo‘yicha sport ustasi hisoblanardi. Abdulmanap doimo o‘g‘lini o‘zi bilan mashg‘ulotlarga olib borardi, shu tariqa Habib 5 yoshida ilk marta o‘zini sport kurashlarida sinab ko‘rdi.

9 yoshga to‘lganida esa u allaqachon haqiqiy mashg‘ulotlarga kirishib bo‘lgandi. “Burgut”ning (Habib) o‘zi ham butun bolaligi kurash zallarida o‘tganini bir necha bor ta’kidlagan. Otasi Abdulmanap barcha shogirdlari qatori o‘z o‘g‘lidan ham qat’iy intizomni talab qilardi. Shu bilan birga u ta’lim olishni ham tashlab qo‘ymasdi, buni ham shaxsan otasi nazorat qilardi.

2001-yilda Habib otasi va aka-ukalari bilan Dog‘iston poytaxti Maxachqal’aga ko‘chib o‘tadi. Kichik Nurmagomedov aralash jang san’atlariga kirishish uchun jangovar samboni intensiv ravishda o‘rganishni boshladi. Bu yo‘lda esa unga otasi har tomonlama tayanch bo‘ldi.

Professionallarga o‘tish va UFC’dagi janglar

19 yoshida Habib sportni tark etish va qo‘riqchi bo‘lib ishlash haqida o‘ylay boshlaydi, biroq otasi bunga qarshi chiqib, shunday deydi: “Agar sen biron bir joyda ishlasang, demak sen sportchi emassan. Senga kerak bo‘lgan hamma narsani o‘zim beraman, sen esa mashq qilasan. Senga faqat kiyim-kechak va yo‘lkira uchun pul kerak, yegulik esa uyimizda ham bor”.

Nurmagomedov otasiga quloq tutdi va bundan-da kuchliroq mashq qila boshladi. Habib 2012-yilda UFC’dagi birinchi jangini o‘tkazib, unda Kamal Shalorusni mag‘lub etdi. Shu tariqa 23 yoshli jangchi bosqichma-bosqich yengil vazn toifasida cho‘qqiga ko‘tarila boshladi. 2017-yilning oxirida Habib da’vogarlik jangida Edson Barbosani mag‘lub etdi. Shundan so‘ng u yengil vaznda chempion yo‘qligidan foydalangan holda El Yakvinta bilan chempionlik jangini o‘tkazdi va ochkolar bo‘yicha g‘alaba qozondi.

Jang uslubi va tayyorgarlik jarayonlari

Janglarda Habib tajovuzkor, u doimo raqiblariga hujum qiladi. Tezkor zarbalar bilan masofani yo‘q qiladi va bir harakat bilan o‘z uslubini qo‘llaydi. Nurmagomedov juda yaxshi kurashadi, u istalgan raqibini oktagonga yiqitishi mumkin. U istalgan raqibni “parter”da o‘z nazoratida ushlab tura oladi. Shuningdek, u raqiblarini zarbalar yomg‘iri bilan “siylash”ni ham unutmaydi.

Habib bo‘sh vaqtlarini ham mashg‘ulotlarga bag‘ishlaydi. Odatiy kunlarda u kuniga ikki martadan, janglarga tayyorgarlik jarayonida esa uch marotabadan mashg‘ulot o‘tkazadi. Uning so‘zlariga ko‘ra, kim ko‘p mashq qilgan bo‘lsa, o‘sha g‘alaba qozonadi. Habib o‘zini sportga bag‘ishlagan, buni  uning Instagram’ga joylab boradigan suratlaridan ham bilib olish mumkin.

Hayot tarzi

Habib dindor inson bo‘lib, o‘ziga ortiqcha narsalarni ravo ko‘rmaydi va doimiy ravishda xayriya ishlari bilan shug‘ullanadi. Habibning pullari evaziga Nigeriyada bir qancha maktablar qurilgani bunga misol bo‘la oladi.

Avvallari “Burgut” janglardan oladigan gonorar evaziga kuch kechirardi, ba’zida hatto qarzdor ham bo‘lib qolardi, ya’ni jangdan janggacha yashardi. Ammo Konor Makgregor bilan jangdan so‘ng Habib o‘zining birinchi million dollarini ishlab oldi. Bundan tashqari, u aynan mazkur jangdan so‘n ko‘plab badavlat homiy va hamkorlarga ega bo‘ldi. Hozir Habib Reebok va Toyota kompaniyalarining rasmiy vakili hisoblanadi, shuningdek, unga energetik ichimliklarni reklama qilish ham mo‘maygina daromad keltiradi. Habibning MMA’dagi butun faoliyati davomida ishlab topgan puli 30 million dollarga yaqin.

Mashinalari

Habibning birinchi avtomobili Lada Priora bo‘lgan. Biroq chempion mazkur mashinani tezda sotib yuborgan.

Uning keyingi avtomobili Mercedes S300 bo‘lib, mahalliy aholi orasida uning obro‘yi ancha baland, boisi 90-yillarda anchayin jiddiy odamlar mazkur avtomobildan foydalangan.

Aftidan unga nemis brendi yoqib qolgan ko‘rinadi, uning navbatdagi “toychog‘i” Mercedes AMG GT S bo‘ldi.

Aytishlaricha, unga ushbu mashina mahalliy tadbirkorlar biri tomonidan sovg‘a qilingan.

Habibning navbatdagi inomarkalaridan biri BMW 6 Serie sanaladi.

Shuningdek, Habibning uyida (Dog‘istonda) Toyota Land Cruiser 200  ham bor. Umuman olganda, Habib o‘ta qimmat xaridlarni amalga oshirishni unchalik ham xushlamaydi.

Shaxsiy hayoti

Habib o‘zining shaxsiy hayotini ommaga oshkor qilmaslikka harakat qiladi, shuning uchun ham shu paytgacha uning rafiqasi yuzini faqat yaqin do‘stlari va qarindoshlari ko‘rgan, xolos.

Habibning aytishicha, rafiqasi ko‘p vaqtini uyda o‘tkazadi, chalg‘imaslik uchun esa u mashg‘ulot yig‘inlari va musobaqalarga oilasini olib bormaydi. Juftlik 2015-yilda qiz, 2017 va 2019-yillarda esa ikki bor o‘g‘il farzandli bo‘lgan.

Habib 2020-yilning 3-iyulida og‘ir judolikka uchradi, uning har bir g‘alabasiga o‘zidan-da ko‘proq hissa qo‘shgan, doimo yonida turgan otasi Abdulmanap Nurmagomedov koronavirus asoratlari oqibatida bu hayotdan ko‘z yumdi. Shundan so‘ng Habib qanchalik og‘ir bo‘lmasin, hayotida ilk bor otasisiz oktagonga ko‘tarilishga majbur bo‘ldi, g‘alabasidan so‘ng esa ko‘z yoshlarini tiyolmadi va ho‘ngrab yig‘lab yubordi. U otasini xotirlar ekan, shunday so‘zlarni yozadi:

Sizni sog‘inaman, siz men uchun bir vaqtning o‘zida ham ota, do‘st, aka va murabbiy edingiz. Menga deyarli hamma narsani o‘rgatdingiz, umid qilamanki, mendan rozisiz. Zero, ota-onaning roziligi, bu — Yaratganning roziligidir.

UFC’ni tark etganidan keyingi hayoti

Shundan keyin ko‘p bor Habibning UFC’ga qaytishi haqida gap-so‘zlar yangradi, biroq Nurmagomedov onasiga bergan va’dasini buzmadi. U hamon oktagonga qaytgani yo‘q va bu ishni qilmoqchi ham emas.

2022-yilda Habib UFC’ning shon-shuhrat zalidan o‘rin oldi.

Habib MMA’ni jangchi sifatida tark etgan bo‘lsa-da, bu sohani to‘liq tark etmadi. U o‘z jamoasi a’zolarini UFC va Bellator musobaqalariga tayyorlamoqda.

Uning biznesdagi ishlari ham yomon emas. Habib GFC promoushenini sotib oldi va uni Eagle FC’ga aylantirdi. Ayni vaqtda ushbu promoushen MDH mamlakatlari vakillaridan tashqari turli jahon yulduzlarini ham jalb qilmoqda.

Habibning UFC’dagi vorisi sifatida e’tirof etiladigan Islom Maxachev kamarni Rossiyaga qaytarishga yaqin. Islom oktabr oyida Charlz Oliveyra bilan chempionlik jangida ishtirok etadi. Hozirda Habib va uning jamoasi bor e’tiborini ushbu jangga qaratgan.