Superliga ishtirokchilari sonini 16 taga yetkazish taklif etilgani ma’lum bo‘ldi

PFL Superliga murabbiylari bilan 2023-yilgi mavsum bo‘yicha yig‘ilish o‘tkazgan. Unda chempionatdagi jamoalar sonini 16 taga oshirish taklif etilgan.

“Dinamo” bosh murabbiyi Vadim Abramov “Championat.asia” bilan bo‘lgan suhbatda bu haqida ma’lum qilgan.

Aytilishicha, Samvel Babayan va Mirjalol Qosimov Superliga jamoalari sonini 16 taga yetkazish bo‘yicha taklifni ilgari surgan.

O‘z navbatida Abramov ham bu taklifni qo‘llab-quvvatlagan. Shundan keyin mutaxassis va PFL bosh direktori Diyor Imomxo‘jayev o‘rtasida tortishuv yuzaga kelgan.

“Klublar soni 16 ta bo‘lishi taklifi Samvel Babayan va Mirjalol Qosimov tomonidan ilgari surildi. Ammo PFL bosh direktori agar shunday bo‘lsa Pro-Ligadan Superligaga chiqadigan klublar qolmasligini aytdi va Pro-Liga klublarida pul yo‘qligini bildirdi.

Shundan keyin men Pro-Ligada pul yo‘qligining Superligaga nima aloqasi borligini so‘radim. Men 14 ta klub kam dedim, 16 ta yoki 20 ta bo‘lsin deganim yo‘q. 14 ta klub bo‘lsa o‘yinlar soni kam bo‘ladi dedim. Diyor Imomxo‘jayev menga siz terma jamoa haqida umuman gapirmang dedi va haqorat qildi. Shundan keyin majlisni tark etdim”, — degan Abramov.

Vadim Abramov qo‘l ostidagi “Dinamo” Superliga 19-turidan keyin 8 ochko bilan so‘nggi o‘rinda bormoqda.