Қозоғистон пойтахтида Нур-Султон номи ёзилган ёзувлар демонтаж қилинмоқда (видео)

Қозоғистон пойтахтида шаҳарнинг эски — Нур-Султон номи ёзилган ёзувлар демонтаж қилинмоқда, деб хабар беради Tengrinews.

Ҳозиргача пойтахтнинг эски номидан иборат юзга яқин ахборот паннолари олиб ташланди.

Бугун, 19 сентябрь куни Қозоғистон пойтахти номини Нур-Султондан Остонага ўзгартириш ҳақидаги фармон кучга кирди.

Мамлакат президенти Қосим-Жўмарт Тўқаев шаҳар қайта номланиши ҳақидаги қонунни 17 сентябрь куни, мамлакат Конституциясига тузатишлар киритилиши тўғрисидаги қонун билан биргаликда, имзолаганди.

Пойтахтга 2019 йилда Қозоғистон биринчи президенти Нурсултон Назарбоев шарафига ном берилган эди, ўшанда шаҳарнинг номини ўзгартиришни Тўқаевнинг ўзи таклиф қилганди. Ундан аввал пойтахт Остона деб аталган ва унга яна шу ном қайтиб берилди.

1998 йилгача республика пойтахти Олмаота шаҳри бўлган, ҳозирги пойтахт эса Акмола деб аталган.

Tengrinews қайд этишича, пойтахт маслаҳати (маҳаллий парламент) шаҳарнинг қайта номланиши бу сафар бюджетга уч йил аввалгидан кўра арзонроқ тушишига умид билдирган. Ўшанда, маслаҳат котиби Ерлан Каналимовнинг сўзларига кўра, давлат органларида табеллар, бланкалар ва муҳрларни алмаштириш 30 миллион тенгедан зиёдга (ўша вақтдаги курс бўйича 80 минг доллардан ортиқ) тушган. Энди электрон ҳужжатлар алмашинувига тўлиқ ўтилгани сабабли харажатлар камаяди. Чиқимлар маҳаллий бюджет томонидан қопланади.