«Дарё» мухбирлари Ўзбекистонда хизмат кўрсатган артист Машраб Кимсанов хонадонида бўлиб, унинг турмуш ўртоғи, актриса Адолат Кимсанова билан суҳбатда бўлди. У ҳаётидаги қийин вазиятлар ва актрисаликдан кетиб, котиба бўлишга мажбур бўлгани ҳақида сўзлаб берди.
— Ҳаёт муаммолари билан овора бўлиб бир зумда 70 ёшни қаршилаб қўяй дебмиз. Ортимга қарасам, яхши кунлари ҳам бор. Аммо касбим орқасидан қувончли кунларим у қадар кўп бўлмади. Илгари инсон меҳнат қилса, ҳамма ниятига етади, деб ўйлардим. Аммо ўзбекчиликда бир меҳнатни қилганда кейин атрофдагилар мақташини кутиш ва ўшаларни ҳам бунга тайёрлаш керак экан. Кўпчилик ижодкорлар шундай қилишига гувоҳ бўлдим. Мисол учун, бир журналист билан гаплашиб, мени мақташи учун уни рози қилишим керак экан.
Шу йили санъатга қадам қўйганимга 50 йил бўлади. Шу касбим ортидан ўлиб кўрмадим холос. Баъзан ўзим ҳақида гапиришга ҳам хижолат бўламан. Чунки 50 йил ишлаган бўлсам ҳам ҳали бирорта унвоним йўқ. Турмуш ўртоғимнинг унвони бор эканки, сўраб суриштириб келдингиз. Мен ўлсам ҳеч ким келмаса ҳам керак. Аслида мен ўз вақтида меҳнат қилганман, аммо ҳаммаси бир чеккада қолиб кетди.
Ҳозирги актёрлар ижодий учрашувларга ҳам пул эвазига боришяпти. Аммо мен борган пайтларда бир тийин пул беришмас эди. 2018 йилга қадар ижодий учрашувларга бордим. Кейинчалик ўзлари ҳам таклиф этмай қўйишди. «Келса дардини айтади», деб ўйлашди, шекилли. Дардимни-ку айтмайман, шунчаки мен ҳам актриса эканлигимни унутишмаслигини истайман.
Илгари ижодий учрашувларга борганда, «Ўзбекистонда хизмат кўрсатган артист» деб чақиришса «Мени унвоним йўқ», деб гапларини тўғирлаб кетмоқчи бўлсам, «Давлат бермаса биз сизга унвон берамиз», деган гапларни эшитиб, хурсанд бўлиб кетардим. Ёнимда ўтирган унвони бор актрисалар мийиғида кулиб, қилиқ қилиб ўтирган кунларни ҳам кўрдим.
Аммо уларнинг ҳеч бир мендек меҳнат қилмаган. Қайсидир йўл билан 30 ёшга қадар унвонни олган актрисаларни ҳам биламан. Аммо бу гапим билан ҳамма шундай демоқчи эмасман, ҳақиқий меҳнатларининг эвазига унвон оладиган ҳам кўп. Бошқа юртларда борми-йўқми билмадим-у, аммо Ўзбекистонда инсон ўз-ўзини реклама қилиши, мақташи керак экан, — дейди актриса Адолат Кимсанова.
Суҳбат давомида Адолат Кимсанова нега давлат театридан кетгани ва моддий жиҳатдан қийналгани ҳақида ҳам сўзлаб берди.
— Ёш томошабинлар театрида 18 йил ишлаганман. Кенжа фарзандимни дунёга келтириб, оналик таътилида ўтирганимда моддий жиҳатдан жуда қийналганмиз. Чунки «Саюз» парчаланиб, «Киноактёрлар студияси»да актёрлар штати бекор қилинганида кейин Машраб ака бутунлай ишсиз қолиб кетганди.
Мажбурликдан бир ярим яшар боламни олиб, театрга бордим. Ўша пайтда Олимжон Салимов режиссёр бўлиб ишга келган экан. «Ёш болангиз бор экан, сиз театрга иш беролмайсиз, боринг 3 ёшга тўлганида келасиз» , деди. Нима дейишимни билмай «Йўл кира қилиб кетишга ҳам пулим йўқ эди, ариза ёзиб қўяқолай», десам гапимни тасдиқлади. Балки тўғридир, аммо ишда инсонийликни ҳам унутмаслик керак.
Ўша инсон турмуш ўртоғим ишсиз қолгач, учта бола билан қийналиб қолганимизни яхши биларди. Хуллас, мана шундай кейин 18 йил ишлаган давлат театридан кетишга мажбур бўлдим.
Нима қилишимни билмай текстил комбинатига ишга бордим. Аммо комбинатнинг ишчи автобуси уйимиз томонга бормас экан. Комбинатдагилар «Қандай яхши актрисасиз, эссиз ишсиз қолдингизми?», деб роса куйинишган эди.
«Энди нима қиламан», деб ҳаёлга берилиб автобусда қайтаётганимда «Кинотехникум» деган ёзувни кўриб, дипломимга ҳам кино сўзи ёзилган-ку, деб бекатда тушиб қолдим. Техникум директорига минг раҳмат, вазиятимни тушуниб, котиба вазифасига ишга олди. Тушлик вақти ҳамма овқатланишга шошса, мен уйимга қараб югурардим. Чунки уни эмизиб келмасам инжиқланишни бошларди.
Машраб ака эса иккита катта боламизга қўшиб, чақалоғимизга ҳам қараб ўтирарди. Аммо бунда турмуш ўртоғимни айбламайман. Чунки у пайтда киноактёрга қийин эди. Энг алам қилгани биз ана шундай қийин кунларни бошимиздан кечирганмиз. Ўшанда ҳам санъатдан кетганимиз йўқ. Машраб Кимсанов «Отамдан қолган далалар» каби фильмда қандай ажойиб ролларни ижро этган. Шуҳрат Аббосов, Мелис Абзалов каби таниқли режиссёрлар билан ишлаган актёр. Аммо бу гаплар ҳозиргиларга умуман қизиқ эмас, — дейди актриса Адолат Кимсанова.
Изоҳ (0)