Qirg‘iziston Tojikiston bilan kelishmovchiliklarni tinch yo‘l bilan hal qilishni rejalashtirmoqda, dedi respublika prezidenti Sadir Japarov xalqqa murojaatida. Uning murojaati matni prezident rasmiy veb-saytida e’lon qilingan.
Japarovning so‘zlariga ko‘ra, ikki mamlakat munosabatlaridagi muammolar ular o‘rtasidagi hududiy chegaralar tartibga solinmaganidan kelib chiqmoqda.
“Davlatimiz chegaralari bilan bog‘liq bahsli masalalar bosqichma-bosqich hal etilmoqda. Ma’lumki, O‘zbekiston respublikasi bilan chegaradagi barcha uchastkalar tartibga solingan va ularni rasman hujjatlashtirish qolgan, xolos. Bugungi kunda faqat Tojikiston respublikasi bilan chegaradosh hududlar aniqlashtirilmagan va muammo tug‘dirmoqda. Biz qirg‘iz—tojik chegarasidagi kelishmovchiliklarni faqat tinch yo‘l bilan hal qilishga urinishda davom etamiz”, — dedi Qirg‘iziston prezidenti.
Qirg‘iziston va Tojikiston chegarasidagi mojaro 16-sentabrga o‘tar kechasi avj oldi. Qirg‘izistonda Botken viloyatining Botken va Laylak tumanlari hamda O‘sh viloyatining bir qismi, Tojikistonda So‘g‘d viloyatining Isfara va G‘ofurov tumanlari bir qismi va Laxsh tumani o‘qqa tutildi. Qirg‘izistonning Botken viloyatida favqulodda holat joriy etildi.
O‘sha kuni ikki davlat rahbarlari Sadir Japarov va Emomali Rahmon o‘t ochishni to‘xtatish bo‘yicha kelishib oldi, biroq keyinchalik bu kelishuv buzildi.
Izoh (0)