“Daryo” nashri 15-sentabrda O‘zbekiston va jahonda ro’y bergan eng muhim voqealarni e’tiboringizga havola etadi.
Bugun nafaqat mahalliy nashrlarning, balki dunyodagi ko‘plab OAVning nigohi Samarqandda o‘tayotgan Shanxay Hamkorlik Tashkiloti sammitiga qaratildi.
Ushbu xalqaro darajadagi uchrashuvga Armaniston bosh vaziri Nikol Pashinyandan tashqari kutilgan barcha davlat rahbarlari tashrif buyurdilar. Bugun o‘tkazilayotgan sammitning kun tartibida ko‘rilgan masalalar haqida xabar beramiz.
O‘zbekiston va Tojikiston rahbarlari chegaraoldi savdo hududini yaratish masalasini muhokama qildi
Samarqanddagi SHHT sammiti doirasida 15-sentabr kuni Shavkat Mirziyoyev Tojikiston prezidenti Emomali Rahmon bilan suhbatlashdi. Bu haqda prezident matbuot kotibi xabar qildi.
Muloqotda chegaraoldi savdo hududini yaratish, qo‘shma investitsiya fondi mablag‘larini jalb qilgan holda kooperatsiya loyihalari sonini ko‘paytirish muhimligi ta’kidlangan.
Shavkat Mirziyoyev va Pokiston bosh vaziri transafg‘on temiryo‘li loyihasini tezlashtirish masalasini muhokama qildi
Shavkat Mirziyoyev SHHT sammitida ishtirok etish uchun Samarqandga tashrif buyurgan Pokiston Islom Respublikasi bosh vaziri Shahboz Sharif bilan uchrashuv o‘tkazdi.
Yetakchilar ikki tomonlama, eng avvalo, savdo-iqtisodiy, investitsiyaviy va transport-tranzit sohasidagi hamkorlik masalalarini batafsil ko‘rib chiqdi.
Transport va logistika sohasidagi hamkorlikni kengaytirish masalalariga alohida e’tibor qaratildi. Transafg‘on temiryo‘li loyihasini tezlashtirish, savdo uchun to‘siqlarni bartaraf etish, tovarlarni o‘zaro yetkazib berish uchun qulay sharoitlar yaratish muhimligi qayd etildi.
Shavkat Mirziyoyev va Ilhom Aliyev avtomobilsozlikda qo‘shma loyihalarni amalga oshirish mavzusini muhokama qildi
Samarqanddagi SHHT sammiti doirasida 15-sentabr kuni Shavkat Mirziyoyev va Ozarbayjon prezidenti Ilhom Aliyev oliy darajadagi kelishuvlar ijrosining borishini ko‘rib chiqdi. Bu haqda prezident matbuot kotibi xabar qildi.
Qayd etilishicha, qo‘shma investitsiya fondini tashkil etishni jadallashtirish, neft-gaz, avtomobilsozlik, kimyo va qishloq xo‘jaligi tarmoqlarida qo‘shma loyihalarni amalga oshirish muhimligi ta’kidlangan.
O‘zbekiston va Xitoy o‘rtasida 15 ta hujjat imzolandi
O‘zbekiston prezidenti Shavkat Mirziyoyev va Xitoy Xalq Respublikasi raisi Si Szinpinning samarali muzokaralaridan so‘ng ikki tomonlama hujjatlarning salmoqli to‘plami qabul qilindi, deb xabar bermoqda prezident matbuot xizmati.
Qayd etilishicha, davlat rahbarlari qo‘shma bayonot imzoladi, unda asosiy kelishuvlar qayd etilgan, har tomonlama strategik sheriklikning bugungi holati va uni mustahkamlash istiqbollari aks etgan.Shuningdek, oliy darajadagi tashrif doirasida 15 ta hujjat imzolandi.
Yana bir ko‘pchilik kutgan muhim yangilik. Eron tomonidan tashkilotga a’zo bo‘lish bo‘yicha majburiyatlarni o‘zida aks ettirgan memorandumga imzo chekildi. Endilikda Eron tashkilotning 40 dan ortiq hujjatlarini ratifikatsiya qilishi kerak. Faqatgina ushbu tartibdan so‘ng mamlakatga to‘liq a’zo maqomi beriladi.
Izoh (0)