Qirg‘izistonning Tojikiston bilan chegaradagi qishloqlari otishmalar tufayli evakuatsiya qilina boshladi

Qirg‘izistonning chegara yaqinidagi Borborduk, Arka, Jashtik va Dostuk qishloqlari (Laylak tumani) aholisi mamlakat ichkarirog‘iga evakuatsiya qilina boshladi, deb yozadi “RBK”.

Respublika Davlat milliy xavfsizlik qo‘mitasi ma’lum qilishicha, Tojikiston tomoni Botken tumanida butun chegara bo‘ylab chegara va fuqarolik obyektlariga hujum qilgan.

“Qirg‘iziston DMXQ Tojikiston tomonini o‘t ochishni to‘xtatib, barcha sa’y-harakatlarini qurolli nizoni susaytirishga va tinchlikni saqlashga qaratishga chaqiradi”, — deyiladi xabarda.

Botken viloyati ma’muriyatining dastlabki ma’lumotlariga ko‘ra, otishmalar chog‘ida to‘rt nafar qirg‘iz chegarachisi jarohatlar olgan.

Tojikiston tomonidan Qirg‘iziston pozitsiyalarini, shu jumladan, chegara zastavasini o‘qqa tutish boshlangani haqida DMXQ 16-sentabr kuni ertalab xabar berdi.

Xususan, Eki-Tash, Chir-Dobo, Kum-Mazar va Orto-Boz manzilgohlaridagi qirg‘iz pozitsiyalari o‘qotar quroldan nishonga olingan. Keyinroq “Kok-Tash” chegara zastavasi minomyotdan o‘qqa tutilgan. Shuningdek, Paski-Arik hududida joylashgan “Samarkandek” chegara zastavasiga qarata o‘t ochilgan.

Shundan so‘ng Laylak tumanidagi Kulundu, Maksat va Jani-Jer qishloqlari ham o‘q yomg‘iri ostida qoldi.

Tojikiston Davlat milliy xavfsizlik qo‘mitasi chegara qo‘shinlari matbuot xizmati, o‘z navbatida, 16-sentabr kuni ertalab “Kok-Tash” chegara zastavasidagi qirg‘iz chegarachilari “kelishuvni buzgan holda” respublikaning “Isfara” otryadiga tegishli “Dushanbe” chegara zastavasini o‘qqa tutganini ma’lum qildi. Bundan tashqari, qirg‘izistonlik harbiy xizmatchilar Isfara shahridagi Xojai A’lo, Kummazor, Surx, Somoniyon, Kulkand, Bobojon Gafurov tumanidagi Xistevarz va Ovchiqal’acha aholi punktlariga qurolli hujum uyushtirgan.

Keyinroq tomonlar o‘t ochishni to‘xtatishga kelishib olgan, biroq Tojikiston tomoni ma’lumotlariga ko‘ra, shunga qaramasdan, qirg‘iz harbiylari mamlakat hududini o‘qqa tutishda davom etmoqda.

Tojikiston va Qirg‘iziston chegarasida 14-sentabr kuni ertalab otishma bo‘lib o‘tgan edi. Keyinroq ushbu voqea oqibatida Tojikiston chegara xizmati xodimi halok bo‘lgani, yana ikki kishi jarohatlangani xabar berildi. Tojikiston chegara xizmati tomonlar vaziyatni barqarorlashtirish bo‘yicha muzokaralar olib borayotganini qayd etgandi.

Qirg‘iziston va Tojikiston chegarasi vaqti-vaqti bilan ikki mamlakat mahalliy aholisi va chegarachilari o‘rtasidagi nizolar hududiga aylanib turadi. Bunga sabab delimitatsiya qilinmagan yerlar bo‘lib, u yerlarda davlatlar o‘rtasidagi chegara qayerdan o‘tishini aniqlab bo‘lmaydi.