Qirg‘iziston va Tojikiston chegarasida chegarachilar o‘rtasida navbatdagi otishma bo‘lib o‘tdi. Bu haqda Qirg‘iziston chegara xizmatiga tayanib, “RBK” xabar bermoqda.
Qirg‘iziston chegara xizmatining ma’lum qilishicha, 14-sentabr kuni ertalab Botken tumanining Buloqboshi qishlog‘idagi chegara uchastkasida tojikistonlik chegarachilar avvalgi kelishuvlarni buzgan holda jangovar pozitsiyalarni egallagani aniqlangan.
“Qirg‘iz tomonining hududni tark etish haqidagi qonuniy talablariga e’tibor bermay, tojik chegarachilari o‘t ochdi”, — deyiladi xabarda. Bunga javoban qirg‘iz chegarachilari ham o‘t ochgan. Chegara xizmati Tojikiston tomoni minomyotlardan foydalanganini da’vo qilmoqda.
“2022-yil 14-sentabr kuni soat 09:30 (Toshkent vaqti bilan 08:30) holatiga ko‘ra, otishmalar goh boshlanib goh tinib turibdi”, — deya qo‘shimcha qildi chegara xizmati.
Dastlabki ma’lumotlarga ko‘ra, Qirg‘iziston tomonidan qurbonlar yo‘q. Tomonlar telefon orqali muloqot qilgan va yuzma-yuz uchrashishni rejalashtirmoqda.
Qirg‘iziston va Tojikiston chegarasi vaqti-vaqti bilan ikki mamlakat mahalliy aholisi va chegarachilari o‘rtasidagi nizolar hududiga aylanib turadi. Bunga sabab delimitatsiya qilinmagan yerlar bo‘lib, u yerlarda davlatlar o‘rtasidagi chegara qayerdan o‘tishini aniqlab bo‘lmaydi.