“Biz asosan sammitning Xitoyga, uning siyosatiga ta’sirini o‘rganyapmiz” — xitoylik jurnalist SHHT sammiti haqida

Xitoyning “Hong Kong Feniks TV” nashri jurnalisti Xiaowen Ni “Daryo” muxbiri bilan suhbatda SHHTning Samarqand sammiti to‘g‘risida fikrlari bilan o‘rtoqlashdi.

Jurnalist O‘zbekistonga SHHT sammitini yoritishga kelganini aytib o‘tar ekan, sammitdagi asosiy e’tiborni prezident Si Szinpinning O‘zbekistonga tashrifiga qaratishini ta’kidladi.

“Shuningdek, bu pandemiyadan keyingi ilk tashrif hisoblanadi. Menimcha, sammit doirasida tashkilotning kengayishi e’tiborga molik jihatlardan biri. Chunki 2017-yildan beri tashkilotga ikkita yangi a’zo qo‘shildi. Eron SHHTning rasmiy a’zosi bo‘ladi”, — deydi Xiaowen Ni.

Jurnalist ish davomida asosan sammitning Xitoyga, uning siyosatiga ta’sirini o‘rganishayotganini aytdi.

“Bundan tashqari, yana bir mintaqaviy muammo — Afg‘oniston masalasi ham kun tartibida. O‘zbekiston prezidentining sammitdan avvalroq chop etgan maqolasidagi Afg‘oniston iqtisodiyotini tiklash to‘g‘risidagi fikrlariga qo‘shilaman.

Mening kutilmalarimga ko‘ra, tashkilot yetakchilari ushbu mamlakatga yordam berish, qo‘shni davlat iqtisodiyotini barqarorlashtirish bo‘yicha kelishuvga erishadi”, — deya qo‘shimcha qiladi “Hong Kong Feniks TV” nashri jurnalisti Xiaowen Ni.