Хитойнинг «Ҳонг Конг Феникс ТВ» нашри журналисти Хиаоwен Ни «Дарё» мухбири билан суҳбатда ШҲТнинг Самарқанд саммити тўғрисида фикрлари билан ўртоқлашди.
Журналист Ўзбекистонга ШҲТ саммитини ёритишга келганини айтиб ўтар экан, саммитдаги асосий эътиборни президент Си Цзиньпиннинг Ўзбекистонга ташрифига қаратишини таъкидлади.
«Шунингдек, бу пандемиядан кейинги илк ташриф ҳисобланади. Менимча, саммит доирасида ташкилотнинг кенгайиши эътиборга молик жиҳатлардан бири. Чунки 2017 йилдан бери ташкилотга иккита янги аъзо қўшилди. Эрон ШҲТнинг расмий аъзоси бўлади», — дейди Хиаоwен Ни.
Журналист иш давомида асосан саммитнинг Хитойга, унинг сиёсатига таъсирини ўрганишаётганини айтди.
«Бундан ташқари, яна бир минтақавий муаммо — Афғонистон масаласи ҳам кун тартибида. Ўзбекистон президентининг саммитдан аввалроқ чоп этган мақоласидаги Афғонистон иқтисодиётини тиклаш тўғрисидаги фикрларига қўшиламан.
Менинг кутилмаларимга кўра, ташкилот етакчилари ушбу мамлакатга ёрдам бериш, қўшни давлат иқтисодиётини барқарорлаштириш бўйича келишувга эришади», — дея қўшимча қилади «Ҳонг Конг Феникс ТВ» нашри журналисти Хиаоwен Ни.
Изоҳ (0)