Samarqand viloyati hokimi o‘rinbosari Rustam Qobilovning “Daryo”ga ma’lum qilishicha, turistlar SHHTning Samarqanddagi sammiti doirasida qurilgan, Markaziy Osiyoning zamonaviy, diqqatga sazovor maskaniga aylanishi mo‘ljallangan — “Buyuk ipak yo‘li” xalqaro turizm markaziga 18-sentabrdan boshlab kirishi mumkin.
SHHTning Samarqanddagi sammitiga juda katta tayyorgarlik ko‘rildi. Mehmonlarni munosib kutib olishga jiddiy e’tibor berilmoqda. Yangi komplekslar, mehmonxonalar, yo‘llar, yangi infrotuzilmalar bunyod etildi. Xalqaro turizm markazi qurilib foydalanishga topshirildi. Uning tarkibida 8 ta zamonaviy mehmonxona, shundan ikkitasi besh yulduzli, ikkitasi to‘rt yulduzli va to‘rttasi uch yulduzli, umumiy hisobda 1275 o‘ringa ega bo‘lgan zamonaviy mehmonxonalar qurilib, foydalanishga topshirildi.Mehmonlarimiz Markaziy Osiyo davlatlaridan ekanligini inobatga olgan holda, ularni O‘zbekistonga, jumladan, Samarqandga qiziqishini tahlil qilib, ularning bu yerda bo‘lib turgan vaqtini samarali o‘tkazish maqsadida Turizm va madaniy meros vazirligi, Samarqand viloyat hokimligi tomonidan dastur ishlab chiqarildi. Dasturda sammitning asosiy yig‘ilishlari o‘tkazilganidan keyin mehmonlar, delegatsiya a’zolari va yurtimizga tashrif buyurgan mehmon davlatlar delegatsiyalariga O‘zbekistonning turizm salohiyatini, madaniy meros obyektlarini ko‘rsatish va tanishtirish, qolaversa, bizning boy madaniy merosimiz va milliy urf-odatlarimizni, an’ana va qadriyatlarimizni ko‘rsatish maqsadida ham universitet xiyobonida katta madaniyat ko‘chalari tashkil qilindi. Har bir davlatning urf-odati, an’analari, kiyinishi bu yerda mujassam bo‘ldi”, — deydi Rustam Qobilov
Hokim o‘rinbosarining qo‘shimcha qilishicha, Samarqand shahrida 22 ta prezident nomerlari tashkil qilingan.
Umumiy mehmonxonalar tarkibiga e’tibor qaratadigan bo‘lsak, Samarqand shahrida 22 ta prezident nomerlari tashkil qilingan. Shundan 16 tasi xalqaro turizm markazida. Qolgan mehmonxonalarning barchasi zamonaviy va xalqaro talablarga javob beradigan 3-4 yulduzli mehmonxonalarni tashkil qiladi. Samarqand shahrida o‘zi mustaqil sayohat qilishni istaganlar uchun ham alohida dastur ishlab chiqilgan. Bu xarita dasturini olgan mehmon Samarqand shahrining istalgan nuqtasidan barcha tarixiy obidalarga, ovqatlanish joylariga, muzeylarga borish imkoniyatiga ega bo‘ladi. Bu kitobcha shaklida bo‘lib, QR kod orqali saytga kirib, kerakli manzilni oson topib oladi. Shuningdek, 9 ta taksi xizmati ham kiritilgan”, — deydi mas’ul.
Hokim o‘rinbosarining ma’lumot berishicha, sammitga tayyorgarlik oldidan mingdan ziyod madaniy meros obyektlari xodimlari, umumiy ovqatlanish korxonalari va shu bilan birgalikda mehmonxona xizmatchilari turizm universitetida o‘qitilgan.
Sammitga tayyorgarlik ko‘rish jarayonida qariyb mingdan ziyod madaniy meros obyektlari xodimlari, umumiy ovqatlanish korxonalari, shu bilan birgalikda mehmonxona xizmatchilarini turizm universitetida o‘qitdik. 48 soatlik kursni o‘tagan xodimlar SHHT sammiti doirasida o‘tkaziladigan tadbirlarni o‘tkazish imkoniyatini beradigan sertifikatlarga ega bo‘ldi. Ushbu sertifikatlar shahrimizdagi 16 ta restoranlarida bor. Ya’ni, ularning menyulari SHHT davlatlarining tillarida va ularning ovqatlanishiga mos tarzda ishlab chiqildi. Ko‘pchilik xalqaro turizm markazi faqatgina SHHT sammitini o‘tkazish uchun qurilgan degan fikrda yuribdi. Biroq, bu joy avvaldan Samarqand shahriga kirib keluvchi Cho‘pon ota tepaligi va Zarafshon daryosi bo‘yidagi eng so‘lim joy hisoblanadi. Bu yer baydarka va kanoyeda eshkak eshish bo‘yicha xalqaro musobaqalar o‘tkaziladigan respublika eshkak eshish kanalida joylashgan. Sammit tugashi bilan xalqaro musobaqalar va yig‘ilishlar o‘tkazish bo‘yicha buyurtmalar qabul qilinmoqda. Xususan, Favqulotda vaziyatlar vazirligi tomonidan Jahon chempionati, triatlon bo‘yicha Osiyo chempionati, yengil atletika bo‘yicha O‘zbekiston chempionati o‘tkaziladi. Hozirda ayrim xalqaro tashkilotlardan ushbu turistik markazda ishbilarmonlik turizimini tashkil qilish bo‘yicha buyurtmalar qabul qilinmoqda. Aniq ishonch bilan ayta olmanki, bu loyihaning ertangi kundagi istiqboli porloq. 18-sentabrdan boshlab turfirmalar mehmonlarini xalqaro turizm markazi va “Boqiy shahar”ga olib borishlari mumkin”, — deydi Rustam Qobilov.
Ma’lumot uchun, “Buyuk ipak yo‘li” xalqaro turizm markazida umumiy fondi 1200 ga yaqin xonaga ega sakkizta xalqaro darajadagi mehmonxona joylashgan. Ulardan biri Samarkand Regency Amir Temur mehmonxonasi bo‘lib, Markaziy Osiyodagi birinchi besh yulduzli mehmonxona, jahonning yetakchi mehmonxonalari assotsiatsiyasi – The Leading Hotels of the World reytingiga kiradi.
Majmuada Markaziy Osiyoda ilk bor Xitoyning eng yirik mehmonxona boshqaruv kompaniyalaridan biri bo‘lgan, bosh qarorgohi Chengdu shahrida joylashgan Minyoun Group kompaniyasining ikkita mehmonxonasi joylashgan. Besh yulduzli Silk Road by Minyoun mehmonxonasi Buyuk ipak yo‘li tarixiga bag‘ishlangan. U 20 qavatli binoda joylashgan 241 ta xonadan iborat.
Turistik markazda nafaqat sayohatchilarni, balki ishbilarmon mehmonlarni ham kutib olish rejalashtirilgan. Kongress markazi 18 ming kvadrat metrlik funksional maydonga ega. Yuqori texnologiyali zalda 3500 ishtirokchiga mo‘ljallangan o‘n uchta konferensiya zallari mavjud. Kongress markazi binosiga “Quyosh” nomli kinetik haykal o‘rnatilgan. Instalyatsiya muallifi taniqli britaniyalik haykaltarosh, asli samarqandlik — Yunus Safardiyor haykal ustida ikki yil ishlagan. Kompozitsiya Sharqning cheksiz saxovatini o‘zida mujassam etgan.
Turistik markazining yana bir yo‘nalishi — sog‘lomlashtirish turizmi. Dam olish maskanining tibbiy klasteri to‘rtta Vellness Park mehmonxonalari bilan ifodalanadi. Ularning har biri keng qamrovli tibbiy ko‘rikdan o‘tkazish va tanani yaxshilash uchun mo‘ljallangan dasturlarga muvofiq ishlaydi. Majmua hududining uchdan ikki qismini bog‘ hududi egallab, u yerda Germaniya, Belgiya, Italiya va Gollandiyadan 50 mingdan ortiq atirgul, 30 ming tup daraxt va yuz minglab butalar ekilgan.
“Buyuk ipak yo‘li” xalqaro turizm markazi 580 million dollarga qurib bitkazilgan. 260 gektardan ortiq maydonda 8 ta mehmonxona bo‘lib, majmua mehmonxonalarida bir vaqtning o‘zida 3000 kishini joylashtirish mumkin. Hududning 170 gektari yashil maydon, 20 kilometrini yo‘l tashkil etadi. Majmua qurilishga 10 mingdan ortiq mutaxassislar jalb qilingan bo‘lib, shahar markazidan 20 daqiqa uzoqlikda joylashgan.
Bugungi kunda Samarqandda SHHT mehmonlarini kutib olish uchun 1551 ta standart, 122 ta lyuks va 22 ta appartament xonalari mavjud 31 ta zamonaviy mehmonxona tayyorlandi. Ushbu mehmonxonalar bir vaqtning o‘zida 1700 ga yaqin mehmonni qabul qila oladi. Shu bilan birga 981 o‘rinli 26 ta mehmonxona zahiraga olingan. Jami 57 ta mehmonxona sammit mehmonlarini kutib olishga tayyor, — deydi viloyat hokimi o‘rinbosari Rustam Qobilov.
Izoh (0)