Dunyodagi eng boy odamlar bir kun ichida 93 milliard dollar yo‘qotdi

Seshanba, 13-sentabrda Amerikaning eng badavlat milliarderlarining boyligi 93 milliard dollarga kamaydi. Bu haqda Bloomberg xabar bermoqda.

Bu kunlik yo‘qotishlar ichida to‘qqizinchi o‘rinni egalladi, chunki AQSHda kutilganidan ham yuqoriroq inflyatsiya ma’lumotlari bozorlarni larzaga keltirdi.

Jeff Bezosning boyligi 9,8 milliard dollarga kamaydi, bu Bloomberg Billionaires Index tomonidan qayd etilganlar orasida eng yuqori ko‘rsatkichdir.

Ilon Maskning boyligi esa 8,4 milliard dollarga kamaydi. Mark Sukerberg, Larri Peyj, Sergey Brin va Stiv Balmerning boyliklari 4 milliard dollardan ko‘proqqa kamaydi. Uorren Baffet va Bill Geyts esa mos ravishda 3,4 milliard va 2,8 milliard dollar yo‘qotdi.

O‘tgan oy xuddi shu amerikalik milliarderlar guruhi Federal zaxira raisi Jerom Pauyellning sakkiz daqiqalik nutqidan so‘ng bir kun ichida umumiy hisobda 78 milliard dollar yo‘qotgandi.

Umuman olganda, dunyodagi eng boy 500 kishining boyligi yil boshidagidan taxminan 1,2 trillion dollarga kamaydi.

Meta Platforms bosh ijrochi direktori Sukerberg 68,3 milliard dollar yoki boyligining qariyb 54 foizini yo‘qotdi, Binance bosh direktori Changpeng Chjaoning boyligi esa 61 milliard dollarga yoki taxminan 64 foizga kamaygan.

Avvalroq dunyoning eng yirik fondi rekord darajada — 174 mlrd dollar yo‘qotgani haqida xabar berilgandi.