Дунёдаги энг бой одамлар бир кун ичида 93 миллиард доллар йўқотди

Сешанба, 13 сентябрда Американинг энг бадавлат миллиардерларининг бойлиги 93 миллиард долларга камайди. Бу ҳақда Bloomberg хабар бермоқда.

Бу кунлик йўқотишлар ичида тўққизинчи ўринни эгаллади, чунки АҚШда кутилганидан ҳам юқорироқ инфляция маълумотлари бозорларни ларзага келтирди.

Жефф Безоснинг бойлиги 9,8 миллиард долларга камайди, бу Bloomberg Billionaires Index томонидан қайд этилганлар орасида энг юқори кўрсаткичдир.

Илон Маскнинг бойлиги эса 8,4 миллиард долларга камайди. Марк Цукерберг, Ларри Пейж, Сергей Брин ва Стив Балмернинг бойликлари 4 миллиард доллардан кўпроққа камайди. Уоррен Баффет ва Билл Гейтс эса мос равишда 3,4 миллиард ва 2,8 миллиард доллар йўқотди.

Ўтган ой худди шу америкалик миллиардерлар гуруҳи Федерал захира раиси Жером Пауеллнинг саккиз дақиқалик нутқидан сўнг бир кун ичида умумий ҳисобда 78 миллиард доллар йўқотганди.

Умуман олганда, дунёдаги энг бой 500 кишининг бойлиги йил бошидагидан тахминан 1,2 триллион долларга камайди.

Meta Platforms бош ижрочи директори Цукерберг 68,3 миллиард доллар ёки бойлигининг қарийб 54 фоизини йўқотди, Binance бош директори Чангпенг Чжаонинг бойлиги эса 61 миллиард долларга ёки тахминан 64 фоизга камайган.

Аввалроқ дунёнинг энг йирик фонди рекорд даражада — 174 млрд доллар йўқотгани ҳақида хабар берилганди.