“Navbahor” klubi bosh murabbiyi Samvel Babayanning murabbiylik litsenziyasi vaqtincha qaytarib olinadi. Bu haqda PFL matbuot xizmati ma’lum qildi.
Qayd etilishicha, Superliga 18-turi doirasidagi “So‘g‘diyona” — “Navbahor” uchrashuvidan (0:0) keyin namanganliklar ustozi Samvel Babayan matbuot anjumaniga kirish chog‘ida futbol muxlislaridan biri bilan tortishib qolgan.
Mazkur vaziyatga Milliy gvardiya xodimlari ham aralashgan. Babayanning baland ovozda xunuk so‘zlar bilan baqirayotganini eshitgan ayrim jurnalistlar matbuot anjumanlari xonasidan ko‘chaga yugurib chiqqan. Bu vaqtda mutaxassis OAV xodimlari holatni tasvirga tushirmoqda degan fikrda, o‘z sheriklaridan “Championat.asia” nashri vakilining telefonini tortib olish hamda undagi videotasvirlarni o‘chirib tashlashni talab qilgan.
Shundan keyin Babayanning sherigi Farhod Umaraliyev jurnalistning qo‘lidan uning shaxsiy telefonini tortib olib, o‘zboshimchalik bilan undagi materiallarni o‘chirib tashlagan.
“Jamoa ustozlari har qanday holatda ham o‘zlarini namuna sifatida ko‘rsatishi shart. Babayan uchrashuv davomida uni tinimsiz haqorat qilgan futbol muxlisi bilan rasmiy tadbirgacha hisob-kitob qilishga urinishi to‘g‘ri ish emas. Qolaversa, PFL musobaqalarini yoritib boruvchi jurnalistlarning stadionlardagi faoliyatini ‘PFL tomonidan o‘tkaziladigan tadbirlar va musobaqalarda ishlovchi OAV vakillari uchun yo‘riqnoma’ orqali tartibga soladi, ularga shu asosda akkreditatsiya taqdim etiladi.
Shundan kelib chiqib, PFL o‘z tadbirlarida faoliyat olib borayotgan OAV vakillarini har qanday holatda ham himoya qiladi. Babayan va uning sheriklari tomonidan amalga oshirilgan ish shu tomondan qaralganda na etika normalariga, na Reglamentga va na qonunchilikka to‘g‘ri keladi.
Yuqoridagilardan kelib chiqib, PFL Samvel Babayanning mazkur ishini O‘FA Tartib-intizom qo‘mitasiga oshiradi va unga qadar murabbiyning litsenziyasini qaytarib oladi.
Shuningdek, qo‘mitada ish ko‘rib chiqilayotgan vaqtda jazo yengilroq bo‘lishi uchun “Navbahor” futbol klubi va shaxsan Samvel Babayanni OAV vakillaridan uzr so‘rashga chaqiradi.
Bunga qadar ham matbuot anjumanida ko‘ngilsiz voqea keltirib chiqargan, biroq keyinchalik o‘z aybiga iqrorligidan kelib chiqib, qayta akkreditatsiya berilgan Farhod Umaraliyevning akkreditatsiyasi ham qaytarib olinadi va u PFL musobaqalari uchun ro‘yxatdan qayta o‘tkazilmaydi. Mazkur shaxs matbuot anjumanida ishtirok etgani aniqlansa, har qanday mezbon klub jarimaga tortiladi”, — deyiladi PFL bayonotida.
Ma’lumot uchun, Samvel Babayan O‘FF (hozir O‘FA) Ijroiya Qo‘mitasi Byurosining 2018-yil 15-yanvardagi 3-sonli qaroriga muvofiq futbolga aloqador har qanday faoliyat bilan shug‘ullanishdan umrbod chetlashtirilgan edi. Keyinroq mutaxassis Latviyada ish boshlagach, tashkilot bu qarorning faqat O‘zbekistonda amal qilishini ma’lum qilgandi.
Ammo oradan bir yil o‘tib, Babayanning diskvalifikatsiyasi chetlatishdan ikki hafta o‘tiboq “Bunyodkor” klubi kafilligi ostida bekor qilingani ma’lum bo‘lgandi
Izoh (0)