O‘zbekistonda xususiy kompaniyalar soni kamaydi

O‘zbekistonda faoliyat ko‘rsatayotgan xususiy korxonalar soni kamayishni boshladi. Bu haqda Davlat statistika qo‘mitasi xabar bermoqda.  

Xususiy kompaniyalar soni 2022-yil 1-sentabr holatiga ko‘ra, o‘tgan yilning shu davriga nisbatan 2,8 foizga qisqargan. 

Kompaniyalar sonining o‘tgan yilga nisbatan pasayishiga axborot va aloqa ( o‘tgan yilga nisbatan 86,3 foiz), qurilish (89,0 foiz), qishloq, o‘rmon va baliqchilik xo‘jaligi (91,2 foiz), tashish va saqlash sohalari (91,9 foiz) ta’sir ko‘rsatmoqda. 

Hududlar kesimida Sirdaryo viloyatida xususiy kompaniyalar soni keskin kamayib ketdi — 17,2 foizga qisqarib, 2 447 ta bo‘ldi. Bundan tashqari, Namangan, Andijon va Jizzax viloyatlarida ham xususiy kompanayilar sonida pasayish kuzatilgan. 

Eng ko‘p xususiy kompaniyalar Toshkent shahrida joylashgan — 12 054 ta. Farg‘ona (11 626 ta) va Qashqadaryo (10 479 ta) viloyatlari yuqori ko‘rsatkich bilan keyingi o‘rinlarni egallagan.  

Mulkdor yagona jismoniy shaxs tomonidan tuzilgan va boshqariladigan tijoriy tashkilot xususiy kompaniya deb e’tirof etiladi. 

Bundan tashqari, 2022-yil yanvar—avgust oyida yangi tashkil etilgan xususiy korxonalar soni 2021-yilning mos davriga nisbatan 434 taga kamaygan. 

Iqtisodiy faoliyat turlari kesimida tahlil qilinganda kompaniyalar sanoatda — 267 taga, qurilishda — 140 taga, axborot va aloqada — 41 taga qisqargan.