10-sentabr kuni Konstitutsiyaga o‘zgartishlar kiritish bo‘yicha takliflarni shakllantirish va tashkiliy chora-tadbirlarni amalga oshirish yuzasidan Konstitutsiyaviy komissiyaning navbatdagi yig‘ilishi bo‘lib o‘tdi. Bu haqda Qonunchilik palatasi xabar qildi.
Qayd etilishicha, unda Komissiya a’zolari, Oliy Majlis Qonunchilik palatasining mas’ul qo‘mitalari hamda ommaviy axborot vositalari vakillari ishtirok etgan. Yig‘ilishda “O‘zbekiston Respublikasining Konstitutsiyasiga o‘zgartish va qo‘shimchalar kiritish to‘g‘risida”gi Konstitutsiyaviy qonun loyihasi hamda uni takomillashtirish bo‘yicha amalga oshirilgan ishlar muhokama qilingan.
Qayd etilishicha, umumxalq muhokamasi jarayonga xorijdagi o‘zbekistonliklar ham befarq bo‘lmagan. Jumladan, Rossiya, Janubiy Koreya, Turkiya, Qozog‘iston, Germaniya va boshqa davlatlardan fuqarolarning yuzlab taklif va munosabatlari kelib tushgan.
Shuningdek, Qonunchilik palatasiga tashrif buyurgan har bir xorijiy delegatsiya a’zolari bilan Takliflar bilan ishlash guruhi, Konstitutsiyaviy komissiya matbuot xizmati xodimlari o‘rtasida suhbatlar uyushtirilgan. Ular O‘zbekiston parlamentining quyi palatasida yaratilgan sharoitlar bilan tanishib, konstitutsiyaviy islohot jarayonida qanday ishlar olib borilayotganini amalda ko‘rgan.
Xuddi shu tajriba haqida Jenevadagi 30 dan ortiq xalqaro tashkilot vakillari, Nyu-Yorkda esa Birlashgan Millatlar Tashkiloti bosh qarorgohida 40 dan ziyod davlatning doimiy vakillari va boshqa xalqaro tashkilotlar mutasaddi rahbarlariga ma’lumot berilgan. Shuningdek, bugungi kunga qadar Konstitutsiyaviy qonun loyihasi mazmun-mohiyatini tushuntirishga bag‘ishlab xalqaro tashkilotlar darajasida 11 ta, xorijiy davlatlarda ham ko‘plab tadbir o‘tkazilgan.
Yig‘ilishda Konstitutsiyaviy qonun loyihasi shu kunga qadar 8 ta milliy ekspertizadan o‘tkazilgani, shuningdek, Toshkentda BMT, YUNISЕF (BMT Bolalar fondi), YXHT (Yevropada xavfsizlik va hamkorlik tashkiloti) kabi tashkilotlar vakillari bilan 3 ta xalqaro jamoatchilik maslahatlashuvi tashkil etilgani ta’kidlangan.
Bundan tashqari, Konstitutsiyaviy qonun loyihasining davlat tilidagi matni tahririni tayyorlash bo‘yicha olib borilgan ishlar to‘g‘risida ham batafsil ma’lumot berilgan.
Qayd etilishicha, loyihada normativ-huquqiy atamalar o‘z mazmuniga muvofiq, yagona shaklda, to‘g‘ri qo‘llanilgan. Adabiy til qoidalari va normalari talablariga hamda yuridik, texnik va boshqa maxsus qoidalarga aniq rioya qilingan. Eng muhimi, loyihadagi normalar sodda va ravon aks ettirilgan. Uning sifati va darajasi hozirgi kundagi jahon konstitutsiyaviy taraqqiyotining tendensiyalariga to‘la mos keladi.
Shu bois, qonun loyihasining matni tayyor bo‘lishi bilan u deputatlar muhokamasiga kiritiladi. Xalq vakillarining fikrlari e’tiborga olingan holda keyinchalik tayyor bo‘ladigan Konstitutsiyaviy qonun loyihasi referendumga qo‘yiladi. Konstitutsiyaviy islohot umumxalq ovoz berish orqali amalga oshirilishi Bosh Qomusning aholi xohish-irodasining ifodasi – haqiqiy xalq Konstitutsiyasi bo‘lishiga xizmat qiladi.
Yig‘ilish yakunida kun tartibidagi masalalar yuzasidan xulosalar qilingan.
Izoh (0)