“Daryo” nashri 12-sentabrda O‘zbekiston va jahonda sodir bo'lgan eng muhim voqealarni e’tiboringizga havola etadi.
O‘zbekiston prezidentining Samarqand sammitiga bag‘ishlangan maqolasi e’lon qilindi
12-sentabr kuni Shavkat Mirziyoyevning Shanxay hamkorlik tashkiloti Samarqand sammitiga bag‘ishlangan dasturiy ahamiyatga ega maqolasi chop etildi.
Maqolada ushbu uchrashuvning O‘zbekiston va zamonaviy dunyo uchun qanchalik muhimligi, yangi davrda O‘zbekiston nega mintaqaviy va global miqyosda keng hamkorlikni ilgari surayotgani, O‘zbekistonning SHHTga raisligi tashkilot faoliyatida qanday aks etishi haqidagi savollarga javob topish mumkin. Maqolaning to'liq matni bilan “Daryo” saytida tanishishingiz mumkin.
Toshkent shahri va qo‘shni viloyatlarga kirish-chiqish yopilishi haqidagi xabarlar rad etildi
Ijtimoiy tarmoqlarda 12-sentabrdan 13-sentabrga o‘tar kechasi — 00:00 dan boshlab Toshkent shahri va qo‘shni viloyatlarga kirish-chiqish yo‘llari yopilishi haqida video tarqaldi.
Holat yuzasidan Ichki ishlar vazirligi matbuot xizmati rahbari Shohrux G‘iyosovning “Daryo”ga ma’lum qilishicha, bu xabarlar noto‘g‘ri. Uning aytishicha, fuqarolardan SHHT sammiti o‘tkazilishi munosabati bilan 14—15—16-sentabr kunlarida Samarqand shahrida rejalashtirilgan sayohatni boshqa kunga qoldirishlari so‘ralgan. Buni YPX xodimlari noto‘g‘ri tushuntirgan.
O‘zbekistonda 178 nafar mansabdor paxta mavsumida majburiy mehnatga yo‘l qo‘ygani uchun javobgarlikka tortilgan
O‘zbekistonda 2019—2021-yillar davomida paxta mavsumida majburiy mehnatga yo‘l qo‘ygan 178 nafar mansabdor javobgarlikka tortilgan. Bu haqda Bandlik va mehnat munosabatlari vaziri Nozim Husanov ma’lum qildi.
Rossiya munitsipal deputatlari Putinning iste’fosini talab qilmoqda
Moskva, Sankt-Peterburg va Kolpinoning 18 ta turli okruglaridan munitsipal deputatlar Vladimir Putinning iste’fosini talab qilmoqda. Tegishli petitsiya matni Sankt-Peterburg munitsipal deputati Ksenya Torstrem tomonidan Twitter’da e’lon qilindi.
Hozirga qadar petitsiyaga 20 nafar deputat imzo chekkan. 8-sentabr kuni Moskvaning Lomonosovskiy munitsipal okrugi deputatlari kengashi Putindan iste’foga chiqishni so‘ragan edi.
Izoh (0)