«Олмалиқ кон-металлургия комбинати» АЖ томонидан амалга оширилаётган «Ёшлик I» конини ўзлаштириш инвестиция лойиҳаси доирасида «Развязка–Ёшлик» станцияларини боғловчи икки изли темир йўллар қуриб битказилди. Шу муносабат билан кон ҳудудида тантанали очилиш маросими бўлиб ўтди. Тадбирда комбинат раҳбарияти ва ходимлари, фахрийлар ҳамда оммавий ахборот воситалари вакиллари иштирок этди.
Мазкур темир йўлларнинг фойдаланишга топширилиши «Ёшлик I конини ўзлаштириш» лойиҳасини амалга оширишда муҳим босқичдир. Жумладан, янги темир йўллар «Қалмоққир» кони тоғ жинсларини «Олмалиқсой» бўш тоғ жинслари заҳира конига «Ёшлик I» конидаги ишлар узлуксизлигига таъсир қилмаган ҳолда ташиш имконини беради.
Тантанали тадбирда «Олмалиқ КМК» бошқарув раиси, сенатор Абдулла Хурсанов нутқ сўзлаб, барча иштирокчиларни қутлади.
«Ёшлик конини ўзлаштириш нақафат юртимиздаги, балки дунёдаги энг йирик лойиҳадир. Лойиҳа доирасида ишга тушаётган темир йўлнинг аҳамияти ҳам ниҳоятда катта ҳисобланади. Янги темир йўл узунлиги 7,4 километр бўлиб, уни лойиҳалаш, қуриш ишлари жуда катта муҳандислик билимини талаб қилади. Шуни алоҳида таъкидлаш керакки, темир йўл муддатидан аввал қуриб битказилди. Бунда, албатта, темир йўлчиларимизнинг табиат инжиқликлари, ишнинг мураккаблигига қарамай ўз вазифасини самарали бажаргани муҳим ўрин тутади. Энг муҳими, ишга тушаётган темир йўлда юк ташиш харажатлари автомобиль транспортига қараганда 8 баравар арзон тушади», – деди жамият раҳбари.
Янги темир йўлнинг қурилиш-монтаж ишлари жорий йилнинг январь ойида бошланган эди. Жорий йилнинг ўтган даври давомида Комбинатнинг Саноат темир йўл транспорти бошқармаси, «Олмалиқметаллургқурилиш» трести ва «Ёшлик I» дирекцияси томонидан жадал суръатларда амалга оширилган қурилиш ишлари натижасида ушбу объект қуриб битказилди. Мазкур лойиҳа доирасида 7,4 километр электрлаштирилган темир йўллар, 9 комплект стрелкали ўтказгичлар қурилди. Янги микропроцессорли марказлаштириш ускуналари ўрнатилиб, жами 51,2 миллиард сўм маблағ йўналтирилди.
Икки изли темир йўлларнинг қурилиши «Қалмоққир» конининг устки қатлам жинсларини ташиш масофасини 2,9 километрга қисқартириши ва локомотив таркиби ҳаракатланиши вақтини тахминан 8,42 дақиқа камайиши ҳамда станция ўтказиш қувватини 35-40 фоизга ошиши натижасида йилига қўшимча равишда 1 минг 200 метр куб (жумладан «Қалмоққир» конидан 500 минг метр куб, «Ёшлик I» конидан 700 минг метр куб) тоғ жинсини ташиш имконини беради.
«Янги темир йўлнинг ишга туширилиши юк ташиш ҳажмини 1,5–2 баробарга оширади. Жумладан, йилига ҳозирги миқдордан 4 миллион тоннадан кўпроқ тоғ жинсларини ташиш имконияти яратади», – дейди ОКМК Саноат темир йўл транспорти бошқармаси машинист йўриқчиси Нурали Отабоев.
Мазкур лойиҳа «Қалмоққир» конида амалдаги ташиш схемаси билан таққослаганда йилига 12,8 миллиард сўм маблағ тежаш имконини беради. Автомобиль транспортида ташиш харажатлари билан солиштирилганда йилига тахминан 153 миллиард сўм иқтисод қилиниши кутилмоқда.
Бугунги кунда «Ёшлик I» кони объектида тоғ-кон ишлари олиб борилаётган бўлиб, 1 минг 727 нафар ишчи-ходимлар ва 400 дона техника ишламоқда. «Ёшлик I» руда қатламига етиш ва уни қазиб олиш мақсадида тупроқ ишлари жадаллик билан олиб борилмоқда. Жумладан, 2022 йил 1 сентябрь ҳолатига жами бажарилган кон қазиш ишлари 127,9 миллион метр кубни ташкил этмоқда. Шу жумладан, 2021 йил давомида 40,3 миллион куб метр, йил бошидан 23,9 миллион куб метр тупроқ ишлари бажарилди.
Кон ишларини бажариш учун бугунги кунгача умумий қиймати 415 миллион доллардан зиёд бўлган 593 донадан ортиқ техника етказиб берилди. Лойиҳа доирасида комбинат Саноат темир йўл транспорти бошқармаси томонидан 27,8 километр темир йўл излари ётқизилди.
Эслатиб ўтамиз, Ўзбекистон президентининг 2017 йил 1 мартдаги ПҚ–2807-сонли ҳамда «Олмалиқ КМК» АЖ конлари негизида рангли ва қимматбаҳо металлар ишлаб чиқаришни кенгайтиришга доир қўшимча чора-тадбирлар тўғрисида» 2020 йил 26 майдаги ПҚ–4731-сон қарорларига мувофиқ, ушбу лойиҳани амалга ошириш натижасида:
I-босқич – 2021-2025 йилларда 290 минг тонна мис катоди, 38 тонна олтин ва 203 тонна кумуш;
II-босқич – 2024-2028 йилларда 400 минг тонна мис катоди, 50 тонна олтин ва 270 тонна кумуш металлари ишлаб чиқаришга эришилади.
Энг муҳими 6 мингдан зиёд янги иш ўринлари яратилади.
Маълумот шериклик ҳуқуқи асосида тайёрланди
Изоҳ (0)