Украина Россия сиёсий элитасининг 606 нафар вакили — Хавфсизлик кенгашин инг 28 аъзоси, Федерация кенгашининг 154 аъзоси ва Давлат думасининг 424 нафар депутатига нисбатан санкциялар киритди, деб ёзади «РБК» Украина президенти Владимир Зеленскийнинг баёнотига таяниб.
Шунингдек, Украина Хавфсизлик хизмати санкцияларга учраган бир нечта шахсларнинг фаолиятига нисбатан операция олиб борган. Натижада божхона ишчилари, шу жумладан, раҳбарлари ҳам четлатилган.
«Чет эл фуқаролиги, хусусан, Россия ва Руминий фуқаролиги борлиги аниқланган санкциялар остидаги шахсларга келсак, Украина Хавфсизлик хизмати таклифи асосида ва амалдаги қонунчиликка мувофиқ, ушбу шахсларнинг Украина фуқаролигини бекор қилиш ҳақида қарор қабул қилдим», — деди Зеленский.
5 август куни Украина бош вазири Денис Шмигал ҳукумат Россияга тегишли 903 та объектни Украина ва украин халқи фойдасига ўтказиш ҳақидаги фармонни тасдиқлаганини айтганди. Мусодара этиш режалаштирилаётган мол-мулкнинг барчаси учта тоифага бўлинади, булар — Россия давлатига тегишли мулк, Россиянинг санкцияларга учраган фуқаролари ва компанияларига тегишли активлар ҳамда Россия банклари активлари.
«Украинада Россия Федерацияси ва унинг резидентлари мулк ҳуқуқи объектларини мажбурий мусодара қилишнинг асосий тамойиллари тўғрисида»ги қонунни Зеленский 10 март куни имзолаган эди. Ҳужжатга мувофиқ, мамлакатда бундай мол-мулкнинг мусодара қилиниши «унинг нархини қопламаган ҳолда» амалга оширилади. Ўшанда ҳужжат фақат юридик шахслар мулкига тааллуқли эди.
6 август куни Зеленский Украинада қарийб 765 миллион долларлик Россия активлари мусодара этилганини маълум қилди. Ундан аввал Украина Иқтисодий хавфсизлик бюроси директори Вадим Мелник мамлакатда Россия ва Беларуснинг 1 миллиард долларлик активлари хатланганини айтганди.
Изоҳ (0)