Latviya, Litva va Estoniya Shengen vizasiga ega Rossiya va Belarus fuqarolari uchun quruqlik chegaralarini kesib o‘tishni sezilarli darajada cheklashga kelishib oldi. Bu haqda Latviya tashqi ishlar vaziri Edgar Rinkevich ma’lum qildi.
Rasmiy taqiq tez orada e’lon qilinadi. Qarorlar milliy hukumatlar tomonidan qabul qilinadi va bir vaqtning o‘zida kuchga kiradi.
Chegarani gumanitar sabablarga ko‘ra kesib o‘tayotganlar, diplomatlar, qarindoshlarini ziyorat qilayotganlar va yuk mashinalari haydovchilari uchun taqiqqa istisno kiritish rejalashtirilgan.
Shu bilan birga, Finlyandiya tashqi ishlar vazirligi Yevropa komissiyasining tegishli qarori qabul qilinmaguncha rossiyalik sayyohlarning kirishini cheklamasligi haqida ma’lum qildi.
Avgust oyi oxirida Yevropa Ittifoqi tashqi ishlar vazirlari Rossiyaning Ukrainaga bostirib kirishiga javoban Rossiya fuqarolariga soddalashtirilgan viza berish bo‘yicha kelishuvni bekor qilishga rozi bo‘lgandi. Shu bilan birga, ular rossiyaliklarga viza berishni to‘liq taqiqlash (buni ko‘proq Rossiya bilan chegaradosh Yevropa davlatlari talab qilmoqda) bo‘yicha kelisha olmagan.
Izoh (0)