Toshkent shahrida “CAITME–2022” to‘qimachilik uskunalari va texnologiyalari xalqaro ko‘rgazmasi bo‘lib o‘tmoqda. Bu haqda “Daryo” muxbiri xabar berdi.
Ko‘rgazmada to‘qish, bo‘yash, pardozlash, tikuv, yigiruv uskunalari va butlovchi qismlari namoyish etilmoqda. Tadbir tashkilotchilaridan biri Nodira Hayitboyeva erishilayotgan natijalar haqida gapirdi.
“CAITME– to‘quvchilik va tikuvchilik uskunalari namoyishiga oid dunyodagi yirik ko‘rgazmalardan biri hisoblanadi. Ko‘rgazmada 19 ta davlatdan 306 ta kompaniya ishtirok etmoqda. Xususan, Turkiyadan 85 ta kompaniya ishtirok etyapti. Shu bilan birga, Germaniya, Shveysariya, Italiya, qo‘shni davlatlar va mamlakatlardan katta-katta kompaniyalar qatnashmoqda. Eng ahamiyatlisi, ko‘p kompaniyalar har yili ishtirok etadi. Albatta, bu ko‘rgazmaning foydasi yuqoriligi anglatadi. Investorlar ham ishtirok etyapti. Ular texnikalarni bemalol sotib olishlari, kompaniyalar bilan hamkorlik qilishlari mumkin”, — dedi u.
Ma’lum qilinishicha, ko‘rgazmada Italiyaning 55 kompaniyasi, Germaniyaning 39 kompaniyasi va Janubiy Koreyaning 10 ta kompaniyasi o‘z imkoniyatlarini namoyish etmoqda. O‘z o‘rnida O‘zbekistonning 42 ta kompaniyasi o‘z mahsulotlarini ko‘rgazma pavilyonlariga joylashtirgan.
Turkiyada tekstil sanoati uchun bo‘yoqlar ishlab chiqaruvchi kompaniyalardan birining O‘zbekistondagi vakili Shuhrat Jalilov ko‘rgazma to‘g‘risida fikr bildirdi.
“Bizning kompaniya tekstil korxonalari uchun bo‘yoqlar, bir qator xomashyo moddalari hamda kimyoviy komponentlarning yirik ishlab chiqaruvchisi hisoblanadi. Shu jumladan, O‘zbekistonning ko‘plab to‘qimachilik korxonalari bilan hamkorlikda ishlaymiz. Ularning aksariyatiga bo‘yoqlar yetkazib beramiz. Bugungi ko‘rgazma tekstil sanoatining kelajagi porloqligini ko‘rsatmoqda. Biz 10 yildan beri ushbu ko‘rgazmada ishtirok etib kelamiz. Bu safar ham ko‘plab kompaniyalar bilan shartnomalar imzoladik. Masalan, Sirdaryo, Xorazm, Farg‘ona va Namangan viloyatlaridan hamkorlarimiz Toshkentga keldi”, – dedi tadbirkor.
Mas’ullarning aytishlaricha, ko‘rgazmada 10 yildan beri doimiy qatnashib kelayotgan kompaniyalar soni bu yil 40 taga yetdi. Ko‘rgazma faoliyati bilan tanishish maqsadida 3 ming nafar fuqaro ro‘yxatdan o‘tdi.
Izoh (0)