Andijon viloyati xalq ta’limi boshqarmasi 8-sentabr kuni ijtimoiy tarmoqlarda “Paxtaobod tumani 38-umumta’lim maktabida o‘quvchilar oyoqyalang kirgizilmoqda” sarlavhasi ostida tarqalgan xabarlar yuzasidan munosabat bildirdi.
Mazkur holat Paxtaobod tumanidagi 38-umumta’lim maktabida sodir bo‘lgani aniqlandi. Holat o‘rganilganda ushbu maktab 310 o‘ringa mo‘ljallangani, bu sig‘im hududda istiqomat qiluvchi maktab yoshidagi bolalarni ta’lim bilan to‘liq qamrab olish talabiga javob berolmay qolgani sabab maktabga investitsiya dasturi asosida 300 o‘rinli qo‘shimcha bino qurilgani ma’lum bo‘ldi.
Aynan maktab rahbariyati tomonidan maktabning toza va ozodaligini saqlash maqsadida maktab uchun alohida oyoq kiyim kiyish tajribasi ilgari surilgani, o‘quvchilar sinfxonalaridagi oyoq kiyimlari kiyilgunga qadar yo‘lakda yurgan vaqtlaridagi tasvirlar ijtimoiy tarmoqlarda keng muhokamalarga sabab bo‘lgani aniqlandi.
O‘quvchilar oyoq kiyimlarini almashtirgunga qadar yo‘lakda yurgani, ushbu tashabbusning ta’lim sifatiga umuman ta’siri yo‘q ekani, qolaversa, o‘quvchilar uchun noqulaylik keltirib chiqishiga sabab bo‘lganini inobatga olgan holda Andijon viloyati xalq ta’limi boshqarmasi boshlig‘i buyrug‘iga asosan maktab direktori O.X. hamda Paxtaobod tumani xalq ta’limi bo‘limi mudiri buyrug‘iga asosan maktabning ma’naviy-ma’rifiy ishlar bo‘yicha direktori o‘rinbosari M.B.ga intizomiy chora qo‘llanildi.
Maktab ma’muriyatiga esa ta’limga aloqador bo‘lmagan tashabbuslarni ilgari surmasliklari, ta’lim jarayonlari Xalq ta’limi vazirligi va qonunchilikda belgilangan tartib-qoidalar asosida olib borilishi va mana shunday holatga takroran yo‘l qo‘ymaslik yuzasidan qat’iy ogohlantirishlar berildi.
Izoh (0)