Тошкентда CAITME–2022 тўқимачилик ускуналари ва технологиялари халқаро кўргазмаси бўлиб ўтмоқда (видео)

Тошкент шаҳрида «CAITME–2022» тўқимачилик ускуналари ва технологиялари халқаро кўргазмаси бўлиб ўтмоқда. Бу ҳақда «Дарё» мухбири хабар берди.

Кўргазмада тўқиш, бўяш, пардозлаш, тикув, йигирув ускуналари ва бутловчи қисмлари намойиш этилмоқда. Тадбир ташкилотчиларидан бири Нодира Ҳайитбоева эришилаётган натижалар ҳақида гапирди.

«CAITME– тўқувчилик ва тикувчилик ускуналари намойишига оид дунёдаги йирик кўргазмалардан бири ҳисобланади. Кўргазмада 19 та давлатдан 306 та компания иштирок этмоқда. Хусусан, Туркиядан 85 та компания иштирок этяпти. Шу билан бирга, Германия, Швейцария, Италия, қўшни давлатлар ва мамлакатлардан катта-катта компаниялар қатнашмоқда. Энг аҳамиятлиси, кўп компаниялар ҳар йили иштирок этади. Албатта, бу кўргазманинг фойдаси юқорилиги англатади. Инвесторлар ҳам иштирок этяпти. Улар техникаларни бемалол сотиб олишлари, компаниялар билан ҳамкорлик қилишлари мумкин», — деди у.

Маълум қилинишича, кўргазмада Италиянинг 55 компанияси, Германиянинг 39 компанияси ва Жанубий Кореянинг 10 та компанияси ўз имкониятларини намойиш этмоқда. Ўз ўрнида Ўзбекистоннинг 42 та компанияси ўз маҳсулотларини кўргазма павильонларига жойлаштирган.

Туркияда текстил саноати учун бўёқлар ишлаб чиқарувчи компаниялардан бирининг Ўзбекистондаги вакили Шуҳрат Жалилов кўргазма тўғрисида фикр билдирди.

«Бизнинг компания текстил корхоналари учун бўёқлар, бир қатор хом ашё моддалари ҳамда кимёвий компонентларнинг йирик ишлаб чиқарувчиси ҳисобланади. Шу жумладан, Ўзбекистоннинг кўплаб тўқимачилик корхоналари билан ҳамкорликда ишлаймиз. Уларнинг аксариятига бўёқлар етказиб берамиз. Бугунги кўргазма текстил саноатининг келажаги порлоқлигини кўрсатмоқда. Биз 10 йилдан бери ушбу кўргазмада иштирок этиб келамиз. Бу сафар ҳам кўплаб компаниялар билан шартномалар имзоладик. Масалан, Сирдарё, Хоразм, Фарғона ва Наманган вилоятларидан ҳамкорларимиз Тошкентга келди», – деди тадбиркор.

Масъулларнинг айтишларича, кўргазмада 10 йилдан бери доимий қатнашиб келаётган компаниялар сони бу йил 40 тага етди. Кўргазма фаолияти билан танишиш мақсадида 3 минг нафар фуқаро рўйхатдан ўтди.