Bugungi kunda xususiy klinikalar bilan davlat kilinikalarini do‘st qilish dolzarb masala. Bu haqda tibbiyot fanlari nomzodi, onkolog-shifokor Maqsud Mallayev “Daryo”ga bergan intervyusida aytib o‘tdi.
Maqsud Mallayev ayni paytda xususiy va davlat klinikalari orasida hasad borligini ta’kidladi.
Tibbiyotimizda birinchi o‘rinda zaxira kadrlarni tayyorlash kerak. Oxirgi 10 yil ichida talabalarning ideal shifokorlardek bo‘lishga intilishi kuzatilmay qoldi. Chunki yaxshi shifokorlar xususiy klinikalarga o‘tgach, ular haqidagi ma’lumotlar yo‘qoldi. Talabalik paytlarimda “katta bo‘lsam, falon shifokorga o‘xshab xirurg bo‘laman”, degan kumirlarimiz bo‘lardi. Shunday ideallarni hozir yana qayta tashkil qilish zarur.Maqsud Mallayevning aytishicha, tibbiyot obro‘sini faqatgina yaxshi natijalar bilan ko‘tarish mumkin.Xususiy klinikalar bilan ham o‘qitish va malaka almashishni yo‘lga qo‘yish kerak. Bugun xususiy klinikalar bilan davlat kilinikalarini do‘st qilish Sog‘liqni saqlash vazirligi bo‘yinidagi eng katta vazifalardan. Chunki hozir xususiy va davlat klinikalarining orasida “jar”lik va hasad bor.
Zaxira kadrlarni yig‘ib, ularni brend darajaga olib chiqa olsak, katta natijalarga erishamiz. Men Isroilda o‘qidim va malaka oshirdim. U yerdagi shifokorlarning bizdan ortiq bilimi yo‘q. Lekin ular tibbiyotni brend darajasiga olib chiqdi. Sababi ular bitta kasb egalarini bir-biri bilan do‘st qilish tizimini yaratdi. Bizdachi? Klinikaga kelib, bir shifokordan dorilar retseptini olingda, ikkinchi bir shifokorga boring. U avval yozilgan dorilarni chizib, o‘chirib yuboradi. “Bular bo‘lmaydi”, deb boshqa dorilar yozib beradi. Ikkala shifokor yozib bergan dorilarni solishtirsangiz, tarkibi bir xil, firma nomi turlicha dorilarni yozib bergan bo‘ladi. Ya’ni holat shu darajagacha yetgan.
“Ko‘chada afisha ko‘tarib “tibbiyotimiz zo‘r”, deb maqtaning, foydasi yo‘q. Undan ko‘ra, siz ikki nafar bemorni yaxshi davolab qo‘ying. Keyin ular “men yaxshi shifokorni taniyman”, deb ortidan o‘nlab, balki yuzlab odamlarni olib keladi. Tibbiyotning reklamasi shu. Boshqa yo‘l yo‘q. Natijasiz har qanday reklama, tibbiyotda nolga teng”, – dedi shifokor.
Avvalroq Maqsud Mallayev hozirgi o‘zbek tibbiyoti sifatini 10 balldan 5-6 ball bilan baholashini aytgandi.
Izoh (0)