Бугун,

  • USD 11095.31
  • RUB 173.84
  • EUR 10772.44

Ўзбекистон соғлиқни сақлаш тизимининг сифати 10 баллик кўрсаткичдан 5-6 баллга мос. Бу ҳақда Тиббиёт фанлари номзоди, онколог шифокор Мақсуд Маллаев «Дарё»га берган интервьюсида айтиб ўтди.

Мақсуд Маллаевнинг таъкидлашича, бир қатор тизимли муаммолар борлиги сабабли тиббиёт ривожланиши секин кечмоқда.

«Тиббиётга натижалар ва халқнинг соғлиқ даражаси баҳо қўйиб беради. Ҳозирги Ўзбекистон тиббиётини умумий ҳисобда 10 баллик кўрсаткичдан 5-6 баллга баҳоласак бўлади. Тиббиёт — шахсга боғлиқ соҳа. Тиббиётимизнинг энг оқсоқланаётган жойи кадр муаммосида.

2016 йилдан ҳозиргача хусусий шифохоналарнинг давлат шифохоналарига нисбати 10 баравар ошди. Яъни ўртада рақобат бошланди. Хусусий клиника шифокорга кўпроқ шароит яратяпти, енгилликлар ва мотивация беряпти. Шундай бўлгач, давлат шифохоналаридаги салоҳиятли шифокорларнинг кўпчилиги хусусий шифохоналарга ўтиб кетди. Оқибатда давлат шифохоналарида кадрлар етишмовчилиги бошланди», — деди мутахассис.

Мақсуд Маллаев

Мақсуд Маллаев
Фото: «Дарё»

Мақсуд Маллаевнинг қўшимча қилишича, айрим шифокорларнинг хорижга чиқиб кетаётганига бир нечта сабаблар бор.

«Бюджетдан миллардлаб маблағлар ажратилиб, давлат клиникаларига янги аппаратуралар олиб келинди. Лекин уларни ишлата оладиган кадрлар ҳозир хусусий клиникаларда ишламоқда ёки кўпчилиги чет элга кетиб юборган.

Улар хорижга кетишининг биринчи сабабини моддий манфаатдорлик деб олсак, иккинчи асосий сабаб — давлат клиникаларида мотивациянинг тубдан синдирилганида. Бизда давлат клиникасига янги ишга келган шифокор салгина бош кўтарса, уни қайта тикланмас қилиб синдириб юбориш ҳолати бор. Катта мажлисларда 5-6 марта руҳан синдирилган шифокор, бутун умрини тиббиётга бағишлаган бўлса ҳам, бор-э, тиббиёт ҳам керак эмас, ундан кўра мардикорлик қиламан, деб, керак бўлса, мардикор бўлиб юрганлар бор.

Тахминан олайлик, давлат битта деҳқонни тайёрлаш учун 10 минг доллар сарфлайди. Бир муҳандисни тайёрлашга 50 минг доллар харажат қилади. Бир шифокорни тарбиялаш учун эса 100 минг доллар сарфлайди. Давлатнинг 100 минг долларли кадрини айрим бошлиқлар тиббиётга оид бўлмаган сабаб билан, яъни шахсий ғараз туфайли ишдан бўшатиб, йўқ қилиб юборди. Ахир 10 йиллаб ўқиган, катта босқичлардан ўтган кадрнинг қадрига етишимиз керак-ку», — деди онколог.

Аввалроқ «Дарё»да Мақсуд Маллаев билан суҳбатнинг тўлиқ шакли эълон қилинганди.

Изоҳ
Асосий янгиликлар
Иқтисодиёт
Коррупция даражаси, иқтисодий эркинлик индекси: Ўзбекистоннинг халқаро рейтинглардаги ўрни қандай ўзгармоқда?
Дунё
АҚШ Ельциннинг Украина ҳақидаги баёнотини махфийликдан чиқарди
Иқтисодиёт
Ўзбекистонда фрилансерлик: улар қанча маош олади ва нега кўпаймоқда?