“Mintaqada barqarorlik faqat Afg‘oniston masalasi hal qilinganidan keyingina bo‘ladi” — SHHT bosh kotibi

SHHT Bosh kotibi Chjan Min Xitoyning CGTN xalqaro yangiliklar telekanaliga bergan intervyusida SHHTga a’zo davlatlarning Afg‘onistonni qo‘llab-quvvatlash borasidagi sa’y-harakatlari ushbu mamlakatni tinch yo‘l bilan qayta qurishga hissa qo‘shishiga umid bildirdi, deb xabar bermoqda “Dunyo” AA.

Uning ta’kidlashicha, Afg‘oniston masalalari bo‘yicha hamkorlik SHHT mavjud bo‘lgan dastlabki kunlardan boshlaboq tashkilot faoliyatining asosiy ustuvor yo‘nalishlaridan biri bo‘lib kelmoqda. Mintaqada barqarorlik faqat Afg‘oniston masalasi hal qilinganidan keyingina bo‘ladi.

“Shuning uchun ham bu davr oralig‘ida SHHT Afg‘oniston masalasiga doimo katta e’tibor, katta ahamiyat qaratgan, shuningdek, bu muammoni hal etish uchun turli vositachilik harakatlarni amalga oshirgan. O‘ylaymanki, mintaqadagi tinchlik, xavfsizlik va barqarorlik ko‘p jihatdan SHHTning mavjudligi bilan bog‘liqdir. SHHTga a’zo davlatlar Afg‘onistonni mustaqil, tinch, betaraf va demokratik davlat sifatida tiklanishiga sodiqligini tasdiqlamoqda”, — degan Chjan Min.

SHHT bosh kotibining so‘zlariga ko‘ra, Afg‘oniston afg‘on jamiyatining barcha etnik, diniy va siyosiy guruhlari vakillari ishtirokida inklyuziv hukumat tuzish kerak.

“Biz ham Afg‘oniston terrorizm va giyohvandlikdan holi tinch mamlakatga aylanishini orziqib kutamiz. SHHT ushbu maqsadga erishish uchun barcha sa’y-harakatlarni amalga oshiradi. O‘ylaymanki, maqsadimiz Afg‘onistonni tinch, xavfsiz va rivojlanayotgan mamlakatga aylantirish”, — degan Chjan Min.

Mavzuga doir: “SHHTning Samarqand sammitida Belarus, Eron va Mongoliya kuzatuvchi, Turkiya va Turkmaniston maxsus taklif qilingan mehmon sifatida ishtirok etadi” — O‘zbekistonning SHHT ishlari bo‘yicha milliy koordinatori