«Хусусий ва давлат клиникалари орасида ҳасад бор» – онколог-шифокор Мақсуд Маллаев

Бугунги кунда хусусий клиникалар билан давлат килиникаларини дўст қилиш долзарб масала. Бу ҳақда тиббиёт фанлари номзоди, онколог-шифокор Мақсуд Маллаев «Дарё»га берган интервьюсида айтиб ўтди.

Мақсуд Маллаев айни пайтда хусусий ва давлат клиникалари орасида ҳасад борлигини таъкидлади.

Тиббиётимизда биринчи ўринда захира кадрларни тайёрлаш керак. Охирги 10 йил ичида талабаларнинг идеал шифокорлардек бўлишга интилиши кузатилмай қолди. Чунки яхши шифокорлар хусусий клиникаларга ўтгач, улар ҳақидаги маълумотлар йўқолди. Талабалик пайтларимда «катта бўлсам, фалон шифокорга ўхшаб хирург бўламан», деган кумирларимиз бўларди. Шундай идеалларни ҳозир яна қайта ташкил қилиш зарур.

Хусусий клиникалар билан ҳам ўқитиш ва малака алмашишни йўлга қўйиш керак. Бугун хусусий клиникалар билан давлат килиникаларини дўст қилиш Соғлиқни сақлаш вазирлиги бўйинидаги энг катта вазифалардан. Чунки ҳозир хусусий ва давлат клиникаларининг орасида «жар»лик ва ҳасад бор.

Захира кадрларни йиғиб, уларни бренд даражага олиб чиқа олсак, катта натижаларга эришамиз. Мен Исроилда ўқидим ва малака оширдим. У ердаги шифокорларнинг биздан ортиқ билими йўқ. Лекин улар тиббиётни бренд даражасига олиб чиқди. Сабаби улар битта касб эгаларини бир-бири билан дўст қилиш тизимини яратди. Биздачи? Клиникага келиб, бир шифокордан дорилар рецептини олингда, иккинчи бир шифокорга боринг. У аввал ёзилган дориларни чизиб, ўчириб юборади. «Булар бўлмайди», деб бошқа дорилар ёзиб беради. Иккала шифокор ёзиб берган дориларни солиштирсангиз, таркиби бир хил, фирма номи турлича дориларни ёзиб берган бўлади. Яъни ҳолат шу даражагача етган.

«Кўчада афиша кўтариб «тиббиётимиз зўр», деб мақтанинг, фойдаси йўқ. Ундан кўра, сиз икки нафар беморни яхши даволаб қўйинг. Кейин улар «мен яхши шифокорни танийман», деб ортидан ўнлаб, балки юзлаб одамларни олиб келади. Тиббиётнинг рекламаси шу. Бошқа йўл йўқ. Натижасиз ҳар қандай реклама, тиббиётда нолга тенг», – деди шифокор.

Аввалроқ Мақсуд Маллаев ҳозирги ўзбек тиббиёти сифатини 10 баллдан 5-6 балл билан баҳолашини айтганди.