Farg‘ona viloyatining So‘x tumanida umumiy qiymati 91 milliard so‘m bo‘lgan yirik loyiha — “Qayroq” nasos stansiyasi foydalanishga topshirildi. Bu haqda “Daryo” muxbiri Azizjon Ermatov xabar berdi.
Ma’lum qilinishicha, asosan, qishloq xo‘jaligi va bog‘dorchilikka ixtisoslashgan So‘x tumanida yerlarni o‘zlashtirish hamda suv chiqarish eng katta muammolardan biri hisoblanadi.
Tumandagi O‘zbekiston va Qirg‘iziston chegarasida joylashgan Qayroq mavzesida ham qishloq xo‘jaligida foydalanish mumkin bo‘lgan 1 ming 448 gektar yer mavjud bo‘lib, mazkur joy faqat yomg‘ir suvi bilan sug‘oriladi. Yil qurg‘oqchil, yomg‘ir kam yog‘gan vaqtda hech qanday hosil olib bo‘lmaydi. “Qayroq” nasos stansiyasi foydalanishga topshirilishi natijasida mazkur muammo ham o‘z yechimini topdi.
Bir metr diametrdagi to‘rt kilometr quvur tarmog‘i tortish orqali ikki ko‘tarmali usulda 211 metr balandlikka obihayot chiqarildi. Umumiy loyiha qiymati 91 milliard so‘mni tashkil etuvchi “Qayroq” nasos stansiyasi suv keltiruvchi va suv tashlash inshootlari, ko‘tarma nasos stansiyalari binolari, olti kilometrdan ziyod taqsimlovchi quvur tarmog‘i va boshqa ko‘plab zamonaviy gidrotexnik qurilmalardan iborat.
Ta’kidlanishicha, ushbu murakkab texnik inshoot Qayroq massividagi 1 ming 80 gektar yaylov yerlarni o‘zlashtirib, foydalanishga kiritish imkonini beradi. Yangi o‘zlashtiriladigan maydonlarda yong‘oq, olma va nok bog‘lari, malina, tut hamda dorivor giyohlar plantatsiyalari barpo etilishi, minglab ish o‘rinlari yaratilishi ko‘zda tutilgan.
Izoh (0)