Parlamentlararo ittifoqqa a’zo davlatlar ayol rahbarlarining sammitida Toshkent deklaratsiyasi qabul qilinadi

AOKAda o‘tkazilgan brifingda Oliy Majlis Senati axborot xizmati rahbari Hojiakbar To‘laganov Parlamentlararo ittifoqqa a’zo davlatlar parlamentlari ayol rahbarlarining Toshkentdagi sammitiga oid ma’lumotlar bilan bo‘lishdi.

Qayd etilishicha, ayol rahbarlarning 14-sammiti 8—9-sentabr kunlari Tashkent City Congress Hall’da bo‘lib o‘tadi.

Sammitda 22 ta davlatdan 140 dan ortiq yetakchi ayol (spikerlar), deputat ayollar, xalqaro parlamentlararo tashkilotlar vakillari ishtirok etadi.

Parlamentlararo ittifoqqa a’zo davlatlar ayol rahbarlarining sammitida Toshkent deklaratsiyasi qabul qilinadi.

Ushbu tadbir MDH mamlakatlari orasida O‘zbekistonda ilk bor o‘tkazilmoqda. Sammit mavzusi “Parlament yetakchiligi: barqarorlik va farovonlikni yanada samarali ta’minlashda xavf-xatarlarni baholash” hisoblanadi.

Sammit doirasida prezident Shavkat Mirziyoyev Parlamentlararo Ittifoqqa a’zo davlatlar parlamentlari ayol rahbarlarining 14-sammiti ishtirokchilari hamda Parlamentlararo ittifoq bosh kotibi Martin Chungongni qabul qilishi rejalashtirilgan.