Халқаро мовий осмон учун тоза ҳаво куни арафасида «Замин» фонди томонидан БМТнинг Атроф-муҳитни муҳофаза қилиш дастури (UNEP), Ўзбекистон Гидрометеорология хизмати маркази ва Давлат экология қўмитаси кўмагида «Тоза ҳавонинг инсон ҳаёти сифати учун аҳамияти» мавзусида муҳокама ўтказилди.
БМТ Бош ассамблеяси 2019 йилда 7 сентябрь кунини Халқаро мовий осмон учун тоза ҳаво куни деб эълон қилган.Ҳавонинг ифлосланиши юқумли бўлмаган касалликлар оқибатидаги ўлимларнинг бошқа омиллардан кейинги иккинчи сабабига айланди. БМТ маълумотларига кўра, сайёрада ҳар ўн кишидан тўққизтаси ифлосланган ҳаводан нафас олади, бу эса, ҳисоб-китобларга қараганда, бир йилда етти миллионга яқин одам ҳаётдан бевақт кўз юмишига олиб келади.
Ушбу халқаро кун бутун жаҳон ҳамжамиятининг эътиборини тоза ҳаво муаммосига қаратиш, инсон саломатлигини ҳимоя қилиш учун ҳаво сифати нақадар муҳим эканлигини эслатишга хизмат қилади.
«Замин» фонди Васийлик кенгаши раиси Зироат Мирзиёева ўз кириш сўзида шундай деди:
Сайёрамиз келажаги ҳаммамизники, демак, атроф-муҳит ҳолатига ҳар биримиз жавобгармиз, ўзимиздан бошлаб хусусий секторгача, жамоат ташкилотларидан ҳукуматларгача — ҳаммамиз биргаликда иш олиб боришимиз шарт.Бу борада амалларнинг катта-кичиги йўқ, атроф-муҳит учун барча ҳаракатлар: ўсимликларга зарар етказмаслик ёки кичик дарахт экиш ҳам, катта корхоналарда чиқиндиларни камайтириш ҳам ўта аҳамиятли.«Замин» фонди ва Ўзбекистон Гидрометеорология хизмати маркази томонидан «Атмосфера ҳавоси ифлосланиши мониторингини автоматлаштириш» лойиҳасини амалга ошириш доирасида эришилган натижалар тақдимот қилинди. Уларнинг энг асосийлари:
- «Ўзгидромет»нинг ҳаво ифлосланишини кузатиш масканлари (жами 63 та) ва 17 та ҳудудий лабораторияси ягона таҳлил марказасига бирлаштирилди.
- Маълумотларни тўплаш ва эълон қилиш учун барча учун очиқ бўлган AirUz платформаси («monitoring.meteo.uz» веб-сайти ва AirUz мобил иловаси) яратилди.
- Тошкентда етакчи Horiba компаниясининг 2 та атмосфера ҳавоси ифлосланишини мониторинг қилиш автоматик станцияси ўрнатилди. Станцияларнинг барча маълумотлари IQAir халқаро платформасига интеграция қилинди.
- Ҳаво ифлосланишини мониторинг қилишнинг бешта халқаро стандарти уйғунлаштирилди ва жорий қилинди.
- «Ўзгидромет»нинг 50 нафардан зиёд ходими ҳаво мониторинги бўйича замонавий ахборот тизимларидан фойдаланиш ва автоматик станцияларни эксплуатация қилишга ўқитилди.
Хорижий мутахассислар иштирокида минтақамизнинг табиий-иқлим хусусиятларини ҳисобга олган ҳолда РМ2,5 ва ПМ10 ҳавони ифлослантирувчи моддаларнинг контцентрациясига доир миллий меъёрлар ишлаб чиқилмоқда.
Тадбирда таъкидланганидек, бутун мамлакатимиз бўйлаб ҳаво мониторингининг тўлақонли автоматлаштирилган тизимининг шакллантирилиши ифлослантирувчи моддаларни қайд этиш, уларнинг аномал контцентрацияларини аниқлаш, шунингдек, тезкор бартараф этиш учун ифлослантириш манбаларини топиш имконини беради.
Тадбир иштирокчилари ҳаво сифати бўйича меъёрларни қўллаш борасидаги халқаро тажриба билан танишдилар ҳамда мониторинг якунида ҳавони назорат қилиш чора-тадбирларини энг намунали халқаро амалиётга мувофиқ ҳолда биргаликда такомиллаштиришга келишиб олди.
Изоҳ (0)