Россия президенти Владимир Путин фурсати келганида Донбассга боради, дея маълум қилди давлат раҳбари матбуот котиби Дмитрий Песков Шарқий иқтисодий форум доирасида.
«Президентнинг у ерга сафарига келсак, ўз вақти келганида бундай сафар амалга ошишига шубҳа қилмайман», — деди Песков.
Шунингдек, президент матбуот котиби Украинада махсус ҳарбий операция ўтказилиши муносабати билан Россия жамиятида алоҳида қутблашиш юзага келганини кўрмаётганини айтди. «Фақат жамиятнинг бирлашуви ҳақида гапириш мумкин», — деди у.
Бундан ташқари, Песков Донбассни ривожлантириш бўйича кенг кўламли режалар ҳақида маълум қилди. «Қурилиш олиб бориляпти, янги объектлар барпо этиляпти, ҳаётий таъминотнинг барча тизимларини қайта тиклаш бўйича қизғин саъй-ҳаракатлар олиб борилмоқда. Бу ҳам сув қувурлари, ҳам энергия таъминоти, ижтимоий объектлар. Фаол ишлар олиб борилмоқда ва у ерда кўп-кўп минглаб одамлар ишлаяпти. Шубҳасиз, бу давом этади», — деди у.
Ҳарбий операция бошланганидан буён Донбассга кўплаб россиялик сиёсатчилар ва мансабдорлар, шу жумладан, Хавфсизлик кенгаши раиси ўринбосари Дмитрий Медведев, Федерация кенгаши биринчи вице-спикери Андрей Турчак, президент администрацияси раҳбари биринчи ўринбосари Сергей Кириенко бориб келган эди.
Изоҳ (0)