Buxoro viloyatining Vobkent tumanida fuqaroga pichoq bilan og‘ir tan jarohati yetkazgan 16 yoshli o‘smirga ikki yil ozodlikdan cheklash jazosi qo‘llanildi. Bu haqda “Daryo”ga jinoyat ishlari bo‘yicha Vobkent tuman sudi raisi ma’lum qildi.
Sud hujjatlariga ko‘ra, voyaga yetmagan J.B. yaqin do‘sti D.D. bilan onasiga tegishli Laсetti’da “Charmgaron” mahallasida joylashgan oshxonaga ovqatlangani borgan. U yerda akasi bilan pivo ichgan. Ovqatlanib bo‘lgach, o‘smir yigitlar mashinaga o‘tirib, avtomashina eshiklarini ochib qo‘ygan holda, jamiyatda yurish-turish va tartib-intizom qoidalarini buzib, ko‘chadan o‘tayotgan odamlarga har xil gaplar gapirib, bachkana va beo‘xshov qiliqlar qilgan. Avtomobil oldidan o‘tgan notanish fuqaro J.Sh.ning ortidan xunuk so‘zlar aytib, uni haqoratlagan. Shunda notanish kishi ortiga qaytib, o‘smir yigitlardan so‘kinishi sababini so‘ragan. O‘smirlar esa uni kaltaklay boshlagan. J.Sh. o‘zini o‘nglab olguncha mashinada turgan pichoqni olib, uning qorin qismiga jarohat yetkazgan. Holatdan xabar topgan J.B.ning akasi voqea joyiga kelib, ukasini bezorilikdan to‘xtatib qolgan.
Respublika sud tibbiy ekspertiza ilmiy-amaliy markazi Buxoro filiali Vobkent tuman punkti xodimlari bemor ahvolini o‘rganib, kaltaklash orqali unga og‘ir tan jarohati yetkazilganini bayonlashtirgan.
Sud majlisida sudlanuvchi J.B. o‘z aybiga to‘liq iqrorlik bildirgan. Qiziqqonligi, janjalni haqiqatan o‘zi boshlagani, notanish fuqaroga nisbatan qilgan xatti-harakati va qilmishidan pushaymonligini aytgan. Jabrlanuvchi J.SH. ham o‘ziga yetkazilgan zarar uning oila a’zolari tomonidan to‘liq qoplab berilgani va voyaga yetmagan bolaga nisbatan da’vosi yo‘qligi haqida ko‘rsatuv bergan.
Sud o‘smirni Jinoyat kodeksining 104-moddasi (qasddan badanga og‘ir shikast yetkazish) bilan aybdor deb topib, sudlanuvchiga nisbatan Jinoyat kodeksining 57-moddasi (yengilroq jazo tayinlash)ni qo‘llab, ikki yil ozodlikni cheklash jazosini qo‘llagan.
Izoh (0)