“GAI to‘xtatib, qonunni buzdingiz desa, siz unga aka, kelishsak bo‘ladimi, deysiz” — Abdulla Abduqodirov qonunga hurmatsizlik haqida
Agar jamiyat tayyor bo‘lmasa, zo‘r qonunlar chiqarilsa ham, ishlamaydi. Bu haqda iqtisodchi Abdulla Abduqodirov “Daryo”ga bergan intervyusida aytib o‘tdi.
Abdulla Abduqodirovning ta’kidlashicha, qonunlarga hurmatni har kim o‘zidan boshlashi kerak.
“Agar jamiyat tayyor bo‘lmasa, zo‘r qonunlar chiqarilsa ham, ishlamaydi. Ko‘p o‘zgarishlarga jamiyatning o‘zi sababchi bo‘lishi, ongi yetib kelishi kerak. Masalan, sizni ‘GAI’ to‘xtatib falon qonunni buzdingiz, ‘shtraf’ to‘laysiz desa, sizning birinchi qiladigan reaksiyangiz: aka, kelishsak bo‘ladimi, deysiz. Bu qonunni buzish-ku! Yoki ko‘chada haydovchilarga e’tibor bering. Qaysi biri yo‘l harakati qoidalariga qoyil qoladigan darajada amal qilyapti? Demak, bu muammo bizning qonimizga singib ketgan. Qonunga hurmatsizlik o‘zimizdan boshlanadi. Lekin biz nimagadir tepadagilarni aybdor qilib ko‘rsataveramiz. Har bir inson qonunga hurmatni o‘zidan boshlasin. Ana undan keyin yuqoridan talab qilsak bo‘ladi”, — dedi iqtisodchi.
Abdulla Abduqodirovning qo‘shimcha qilishicha, ijtimoiy adolatni ta’minlash ham davlat va jamiyat uchun o‘ta muhim masalalardan.
“Katta iqtisodiy yutuqlarga katta ishlab chiqaruvchilar bilan erishish mumkin. Kichik va o‘rta biznes siljish beradi, lekin u siljish 10-15 yilga cho‘zilishi mumkin. Bizda yirik bizneslarga ko‘p va katta imtiyozlar beriladi. Bir hisobdan, yirik sanoat vakillari kuchayishini istaymiz, ular xalqaro maydonga chiqsin, deymiz. Lekin ularga alohida sharoit yaratib berish jamiyatda tenglik huquqini buzish bilan barobar. Ya’ni qonun bilan qilinyapti, ammo u qonunning orqasida turgan ijtimoiy adolat buzilyapti.
Imtiyozlar masalasi ham sodda narsa emas. Aslida, eng boy korxonalar QQS to‘lamaydi. Bu, albatta, ijtimoiy adolat nuqtayi nazaridan juda ham yomon narsa. Bunday imtiyozlarni qayta ko‘rib chiqishimiz va yo‘q qilishimiz lozim. Buning uchun juda katta ijtimoiy-iqtisodiy va ma’muriy iroda kerak. Aslida, mana shu iroda bizga yetishmay turibdi.
Bunday imtiyozlarning jamiyatga bo‘lgan zarari iqtisodiy hisobotlarda to‘liq ochib berilishi shart. Bu haqda ko‘p gapirishimiz, jamiyatga va rahbariyatga yetkazishimiz lozim”, — dedi mutaxassis.
