Alisher Qodirov Ta’lim sifatini nazorat qilish inspeksiyasi va funksiyasini Oliy Majlisga o‘tkazishni taklif qildi

Oliy Majlis Qonunchilik palatasi spikeri o‘rinbosari, “Milliy tiklanish” demokratik partiyasi markaziy kengashi raisi Alisher Qodirov yangi avlod pedagoglarini tayyorlash uchun bir qator takliflarni ilgari surdi.

Uning ta’kidlashicha, davlat nafaqat maktabda o‘qish uchun sharoitni, balki to‘liq kitob bilan ta’minlash va qisman ovqatlantirish xarajatlarini ham o‘z zimmasiga olish orqali millat va davlat kelajagiga juda katta investitsiya yo‘naltirmoqda. Buning natijasi sog‘lom, tafakkurli, vatan va millatini ardoqlaydigan, huquq va majburiyatlarini anglaydigan va amal qiladigan inson bo‘lishi kerak. Bu natijaga erishish yoki erishmaslikni pedagoglar hal qiladi.

“Sovet davlati ham hamma narsani tekin qilgan, lekin pedagoglar oldiga sovet ideologiyasi bilan tarbiyalangan e’tiqodsiz, befikr va o‘zini beqadrligidan minnatdor jamiyatni yaratish kabi buzuq vazifa qo‘ygan. A’lo baho uchun o‘qi, yolg‘on bo’lsa ham, doimo birinchi bo‘l, oliy ma’lumotsiz ikkinchi ‘sort’ bo‘ladi kabi ustuvorliklar bilan to‘yingan bolalar bu mezonlarni jamiyatni o‘lchoviga aylantirdi”, — deydi Qonunchilik palatasi spikeri o‘rinbosari.

Deputat bugungi tez o‘zgaruvchan va ayovsiz raqobat muhitida o‘zini va vatanni anglaydigan va qadrlaydigan yangi avlod pedagoglarini tezlashtirilgan shaklda tayyorlash uchun quyidagi takliflarni berdi:

1. Pedagoglar faqat davlat buyurtmasiga muvofiq o‘qitilishi lozim;
2. Oliy ma’lumot olgan pedagog 3-5 yil davlat tayinlovi asosida maktabda ishlashi shart (albatta, maosh va ish sharoitini to‘liq yaratib berish hisobiga);
3. Pedagogika sohasiga alohida psixoanalitik sinov, ijodiy imtihonda tanlab olingan va imtihondan muvaffaqiyatli o‘tgan abituriyentlar qabul qilinishi kerak;
4. Pedagoglarni tayyorlash o‘quv dasturi 3 yilga qisqartirilishi lozim;
5. Pedagog faoliyatini davom ettirishi uchun har yili malakasini talab darajasida ekanligini tasdiqlashi shart bo‘lishi kerak. Pedagog malakasini tizimli va davlat hisobiga oshirish amaliyoti serxarajat, samarasiz va mantiqsiz;
6. Ta’lim sifatini nazorat qilish inspeksiyasi va funksiyasi Oliy Majlisga o‘tkazilishi kerak. Bu masalada kamchiliklar bilan murosasozlik emas, murosasizlik prinsipi ishlashi kerak;
7. Darsliklarning mazmuni, ularga kiritiladigan har qanday o‘zgartish va qo‘shimchalar Oliy Majlisda tuziladigan maxsus komissiya tomonidan tasdiqlanishi kerak.

Mavzuga doir:

• Maktab darsliklari ijarasi bepul bo‘ladi: prezident bu bo‘yicha topshiriq berdi
• Darsliklar nashr etishda korrupsion sxemalarga yo‘l qo‘ymaslik shart: Prezident administratsiyasi boshchiligida darsliklar to‘liq tekshiruvdan o‘tkaziladi
• Komil Allamjonov maktab darsliklari bo‘yicha muammo va yechimlar haqida murojaatlar yo‘llashni so‘radi